ادىلەت ءمينيسترى اتاۋى «كوگىلدىر» كلۋبتىڭ تاعدىرى نە بولعانىن ايتتى
ادىلەت ءمينيسترى ازامات ەسقارايەۆ ب ا ق وكىلدەرىمەن وتكەن بريفينگىدە اتاۋىن بەيادەپ سوزبەن قويعان جاۋاپكەرشىلىگى شەكتەۋلى سەرىكتەستىكتىڭ تاعدىرى نە بولعانىن ايتتى، دەپ حابارلايدى Kazinform اگەنتتىگى.
«ءيا، حاباردارمىز. ءبىز بىردەن ارەكەت ەتتىك. جارتى كۇننىڭ ىشىندە ءتيىستى ايماقتىڭ دەپارتامەنتى سوتقا جۇگىنىپ، كاسىپورىندى جاۋىپ تاستادى. ءبىز مۇنىڭ سەبەپتەرىن دە انىقتادىق. زاڭدى تۇلعالاردى قۇرۋ تۋرالى زاڭنامانى جەڭىلدەتكەن كەزدە ازداعان عانا اقشامەن ونلاين فورماتتا كومپانيا اشۋعا مۇمكىندىك ۇسىنىلعان ەكەن»، - دەدى ول جۋرناليست سۇراعىنا بەرگەن جاۋابىندا.
مينيستر كومپانيانى قالاي اتاۋ اركىمنىڭ ءوز ەركىندەگى شارۋا ەكەنىن ايتادى.
«ادىلەت دەپارتامەنتى ونى تەكسەرمەيدى. كومپانيانى، بىلۋىمشە، «ازاماتتارعا ارنالعان ۇكىمەت» كوممەرتسيالىق ەمەس اكسيونەرلىك قوعامى ارقىلى تىركەۋگە بولادى. مىنە، بۇل جەڭىلدىك ءىس جۇزىندە ءبىزدىڭ مەنتاليتەتىمىزگە دە، مادەنيەتىمىزگە دە سايكەس كەلمەيتىن كاسىپورىننىڭ پايدا بولۋىنا اپارىپ سوقتى. ءبىز بىردەن شارا قابىلداپ، ونى جاۋىپ تاستادىق. ءبىز قازىر زاڭدى تۇلعالاردى تىركەۋ جونىندەگى زاڭنامانى جەتىلدىرۋدى پىسىقتاپ جاتىرمىز»، - دەدى ازامات ەسقارايەۆ.
ايتۋىنشا، ازاماتتارعا زاڭنامادا مۇنداي ارەكەت ءۇشىن قانداي دا ءبىر ايىپپۇل سانكتسياسى قاراستىرىلماعان.
«وكىنىشكە قاراي، زاڭناما بۇل تۇرعىدا ناقتى تىيىم سالۋدى كوزدەيدى دەپ ايتا المايمىن. ءبىز زاڭنامانى مەملەكەتتەردى، كاسىپورىنداردى، زاڭدى تۇلعالاردى قۇرۋ ماسەلەسىن باقىلاۋدى كۇشەيتۋ تۇرعىسىنان پىسىقتاپ جاتقانىمىزدى ايتتىم، جاۋاپكەرشىلىك ماسەلەسىن شىنىمەن قاراستىرۋ قاجەت. مۇمكىن ادام شىنىمەن ءازىل ءۇشىن وسىنداي زاڭدى تۇلعانى قۇرۋعا باستاما قىلعان شىعار. مەنىڭ تۇسىنۋىمشە، قوعام بۇل يدەيانى قاتتى ۇناتپادى» ، - دەدى ادىلەت ءمينيسترى.
ەسكە سالساق، بىرنەشە اي بۇرىن ب ا ق- تا اتاۋى بەيادەپ سوزدەردەن قۇرالعان كلۋب تۋرالى مالىمەت تاراعان بولاتىن.
