اديداس كومپانياسى بەللا حاديد بەينەلەنگەن جارنامانى الىپ تاستاپ، كوپشىلىكتەن كەشىرىم سۇرادى

استانا. قازاقپارات - Adidas جۇما كۇنى ميۋنحەندەگى 1972 -جىلعى وليمپيادا ويىندارىنىڭ ديزاينىمەن جاسالعان كروسسوۆكالاردىڭ جارنامالىق ناۋقانىن قايتا قارايتىنىن مالىمدەدى. ونداعى ايگىلى مودەل بەللا حاديدتىڭ بەينەسى يزرايل تاراپىنان ۇلكەن سىنعا ۇشىرادى، دەپ جازادى Euronews.

نەمىس سپورتتىق كيىم كومپانياسى SL72 كروسسوۆكالارىن «ماڭگىلىك كلاسسيكا» دەپ اتاپ، جارنامالادى.

بەيسەنبى كۇنى يزرايلدىڭ X الەۋمەتتىك جەلىسىندەگى رەسمي اككاۋنتى حاديدكە قارسى شىعىپ، «ميۋنحەندەگى وليمپيادا كەزىندە پالەستينالىق تەرروريستەر ون ءبىر يزرايلدىكتى ولتىرگەنىن» ەسكە سالدى.

اكەسى پالەستينالىق حاديد وسى جىلدار ىشىندە يزرايل ۇكىمەتىن سىناپ، ەۆرەي مەملەكەتىنە دۇشپاندىق تانىتىپ، پالەستينالىقتاردى قولدايتىن كوپتەگەن مالىمدەمەلەر جاسادى.

7-قازانداعى شابۋىلدان كەيىن جانە يزرايل مەن حاماس اراسىنداعى قاقتىعىس باستالعاننان بەرى ول Instagram-دا جازىقسىز ادامداردىڭ قازا بولعانىنا وكىنىش بىلدىرەتىن مالىمدەمە جاريالادى جانە ءىزباسارلارىن گازا تۇرعىندارىن قورعاۋ ءۇشىن ءوز باسشىلارىنا قىسىم كورسەتۋگە شاقىردى.

سوڭعى مالىمەتتەرگە قاراعاندا، حاديد Adidas كومپانياسىن سوتقا بەرۋگە شەشىم قابىلدادى. ءبىرقاتار اقپارات قۇرالدارى كومپانيانى يزرايلشىل لوببيدىڭ جەتەگىندە ءجۇر دەپ ايىپتايدى. حاديدتىڭ جاقتاستارى ونىمدەرگە بويكوت جاريالاۋعا شاقىردى.

كومپانيا وكىلدەرى كەشىرىم سۇراپ، «ناۋقاننىڭ قالعان بولىگىن دەرەۋ قايتا قارايتىندارىن» ايتتى.

اۆتور
ەركەجان سماعۇلوۆا