اۋدارىسپاقتان قازاقستاندىق ءۇش سپورتشى فينالعا ءوتتى

استانا. KAZINFORM - دۇنيەجۇزىلىك كوشپەندىلەر ويىندارى اياسىندا اۋدارىسپاقتان جارىس ءوتىپ جاتىر. ەتنواۋىلدا ءوتىپ جاتقان ءدۇبىرلى دودانى كورۋگە جينالعانداردىڭ قاراسى كوپ.

اۋدارىسپاق ويىندارىنا 9 ەلدەن 64 ويىنشى قاتىسۋدا. ونىڭ قاتارىندا قازاقستان، قىرعىزستان، وزبەكستان، موڭعوليا، رەسەي، قىتاي، ا ق ش، تۇركيا جانە ۆەنگريا بار.

«تۇستەن كەيىن وتەتىن اقتىق سىنعا قازاقستاننان ءۇش سپورتشى جولداما الدى. ولار - ەرمەك قۇرالباي (60 كەلى)، المات لاتىپبەك (70 كەلى) جانە دارىن وتكەلباي (80 كەلى). جالپى اۋدارىسپاق بويىنشا قازاق جانە قىرعىز كومانداسى مىقتى سانالادى»، - دەدى اۋدارىسپاق سپورتىنان قازاقستان قۇراماسىنىڭ باس باسپكەرى جانباتىر بيمۇسايەۆ.

ايتا كەتەيىك، بۇگىن 9-قىركۇيەك كۇنى استانا قالاسىندا V دۇنيەجۇزىلىك كوشپەندىلەر ويىندارىنا قاتىسۋشى سپورتشىلار 7 سپورت تۇرىنەن سىنعا ءتۇسىپ جاتىر.

بۇعان دەيىن كوكپاردان العاشقى سالىمدى قازاقستاندىق كوكپارشىلار سالعانىن حابارلاعان ەدىك.