ادامدى بەت-الپەتىنەن تانيدى: وسكەمەندە جاس عالىمدار ەرەكشە شكاف جاساپ شىعاردى

ғалым
فوتو: كەيىپكەردىڭ جەكە مۇراعاتىنان

وسكەمەندەگى س. امانجولوۆ اتىنداعى ش ق ۋ-دا «اقپاراتتىق جۇيەلەر» ماماندىعىندا وقيتىن رۇستەم جۇمابەككە QR كود پەن Face ID يدەنتيفيكاتسياسى ارقىلى اشىلاتىن اقىلدى شكاف جاساپ شىعاردى. وعان ۋنيۆەرسيتەت لەكتورى باقىتجان كوپجاساروۆ قولداۋ تانىتقان. شكافتىڭ قالاي جاسالعانىن ءبىلۋ ءۇشىن Kazinform ءتىلشىسى جاس عالىمنان سۇحبات العان ەدى.

- ەرەكشە شكاف جاساۋ يدەياسى قالاي كەلدى؟

- ساباقتان بوس ۋاقىتىمدا فيتنەس- كلۋبقا بارعاندى جاقسى كورەمىن. ونداعى سىرت كيىمدى سالاتىن شكافتار كىشكەنتاي كىلتپەن قۇلىپتالپدى. بىردە كىلتتى جوعالتىپ الىپ، ءبىراز ابىگەرگە تۇسكەنىم بار. سول جاعدايدان كەيىن كىلتسىز اشىلاتىن شكاف جاساۋ جايلى وي كەلدى. اسىرەسە ادامنىڭ بەت- البەتىن تانيتىن جانە QR كودپەن اشىلاتىن بولسا ىڭعايلى عوي. ايتپەسە تەك مەن ەمەس، كوپ ادام كىلتىن تابا الماي قينالادى، كەيبىرەۋلەر كىلتتى ۇيگە الىپ كەتىپ، سول كۇيى قايتارماي جاتادى. بۇل كلۋب يەلەرىنە دە قولايسىزدىق تۋدىرادى.

ءسويتىپ، ءوزىم ءبىلىم الىپ جاتقان سارسەن امانجولوۆ اتىنداعى شىعىس قازاقستان ۋنيۆەرسيتەتىندە ستۋدەنتتەر اراسىندا وتەتىن StartUp جوباسىنا قاتىسۋعا بەل بايلادىم. اقىلدى شكاف جاساۋ يدەياسىن فيتنەس- كلۋب يەسىنە ايتىپ كورگىم كەلدى. ماعان جەكە كاسىپكەرمەن باستاپقى كەلىسىم جۇرگىزۋگە جانە مەنتور تاڭداۋعا فاكۋلتەت دەكانى سالتانات سايلاربەك قىزى كومەكتەستى. مەنتور، ياعني، كەڭەسشى جانە جەتەكشى رەتىندە ۋنيۆەرسيتەتتە ارنايى پاندەردىڭ ءىس-تاجىريبەسىن جۇرگىزەتىن لەكتور باقىتجان تۇرمىش ۇلى قولداۋ ءبىلدىردى. ودان كەيىن فيتنەس- كلۋبتىڭ كيىم ايىرباستايتىن ورنىندا ەرلەر مەن ايەلدەر بولمەسى بولەك بولعاندىقتان، نازىك جاندارعا ارنالعان بولمەدەگى شكافتارعا ەلەكترومونتاجدىق جانە سىناق جۇمىستارىن جۇرگىزۋ ءۇشىن ءبىر توپتا وقيتىن كۋرستاس ارۋجان راجاپاۆانى جوباعا اتسالىسۋعا شاقىردىم.

- اقىلدى شكافتىڭ مۇمكىندىكتەرى قانداي؟

- ءبىز اقىلدى شكافتىڭ العاشقى نۇسقاسىن وسىدان 3 اي بۇرىن جاساپ شىعاردىق. اي سايىن شكاف پايدالانۋشىلارىنىڭ وتىنىشتەرىن ەسكەرىپ، ودان سايىن ىڭعايلى بولا ءتۇسۋى ءۇشىن ونى دامىتىپ وتىردىق. ءقازىر فيتنەس- كلۋبقا كەلۋشىلەر اۋەلى FaceID، ياعني، بيومەتريالىق باقىلاۋدان ءوتىپ، ءوزىن جۇيەگە راسىمدەيدى. ودان سوڭ سىرت كيىمىن ساقتاۋ ءۇشىن كيىم ايىرباستايتىن بولمەدەگى جۇزدەن استام شكافتىڭ ىشىنەن كوڭىلىنەن شىعاتىن بىرەۋىن تاڭداپ الادى. وسىلايشا، ادەتتەگى كىلتتەردىڭ ورنىنا ادام بيومەترياسىنىڭ ەرەكشەلىكتەرى قولدانىلادى. بۇل جوعارى قاۋىپسىزدىك پەن جۇمىس پروتسەستەرىن اۆتوماتتاندىرۋدىڭ كەپىلى. شكاف مۇمكىنشىلىكتەرىن تولىق اشا المايمىن، سەبەبى ول كوممەرتسيالىق قۇپيا.

- وسىنداي شكافتاردى ورناتۋعا تاعى نيەت ءبىلدىرىپ جاتقاندار بار ما؟

- جۇزدەن استام اقىلدى شكاف وسكەمەندەگى Terrasport فيتنەس-كلۋبىنا ورناتىلعان. جەكە كاسىپكەر ولگا يۆانوۆاعا العىس بىلدىرەمىز. يدەيامىزدى ىسكە اسىرۋعا، سىناق جۇرگىزۋگە مۇمكىندىك بەردى. نەگىزى كەز كەلگەن بيزنەس يەسى ءوز كاسىبىن سىناق الاڭى رەتىندە بەرە بەرمەيدى. بۇدان بولەك، 3 سەكتسيالى اقىلدى شكافقا قىزىعۋشىلىق تانىتقاندارعا دەمونستراتسيا جاساۋ ءۇشىن قالاداعى اكىمشىلىك عيماراتتاردىڭ بىرىنە ۋاقىتشا ورنالاستىردىق. حابارلاسىپ، سۇراپ جاتقان باسقالار دا بار. سەبەبى ءبىزدىڭ اپپاراتتىق-باعدارلامالىق جۇيە وسىعان ۇقساس يمپورتتىق جۇيەلەردەن 3 ەسە ارزان تۇرادى. ودان كەيىن ءبىزدىڭ جۇيەنى تاڭداعان وسكەمەندەگى كاسىپورىندارعا تۇراقتى تۇردە جەدەل تەحنيكالىق قولداۋ كورسەتىپ وتىرامىز. قاتەلەسپەسەم، قازىرگى ۋاقىتتا قالادا مۇنداي قىزمەت كورسەتىن مەكەمە جوق.

- الداعى ۋاقىتتا وسىعان ۇقساس باسقا دا يننوۆاتسيالىق جوبالاردى قولعا الۋ ويدا بار ما؟

- ءيا، وسىمەن توقتاماي، الدا باسقا دا جوبالاردى جاساۋ ءۇشىن كۋرستاستارمەن بىرىگىپ «Lemma» دەگەن توپ قۇردىق. قازىر سول توپ مۇشەلەرى تاعى ءبىر جوبا باستادىق. ازىرشە ول جوبانى ەلدىڭ قانشالىقتى جاڭاشىل دەپ قابىلدايتىنى بەلگىسىز. سەبەبى ءبىز كوبىنە رەينجەنيرينگ جانە كەرى ينجەنەرينگپەن شۇعىلدانامىز. ازىرشە تەحنولوگيا جاساۋدا ترەند بەرە المايمىز. ماقساتىمىز - بار تەحنولوگيالاردى ءجىتى زەرتتەۋ جانە قالا تۇرعىندارىنىڭ وعان قول جەتكىزۋىنە مۇمكىندىك جاساۋ.

- نەگە توپتى «Lemma» دەپ اتادىڭىزدار؟

- بۇل ماتەماتيكالىق ۇعىم. «لەمما» دەگەنىمىز دالەلدەنگەن تۇجىرىم جانە ول باسقا ءىرى تۇجىرىم دالەلدەمەسىنە قولدانىلادى.

- اڭگىمەڭىزگە كوپ راحمەت. توپتارىڭىز اتاۋىنا ساي جاڭا تەحنولوگيالار نەگىزىن تۇجىرىمداپ، ءىرى يننوۆاتسيالىق جوبالاردى ىسكە اسىرا بەرگەي.

اۆتور

تالعاتجان مۇحامەتبەك ۇلى

سوڭعى جاڭالىقتار