ادامدار جاسىل ەنەرگيا، تازا سۋ ءۇشىن تولەۋگە دايىن بولۋى كەرەك - نوبەل سىيلىعىنىڭ لاۋرەاتى

نوبەل سىيلىعىنىڭ لاۋرەاتى، №1 كليمات جانە تۇراقتىلىق بويىنشا ساراپشى راە كۆون چۋنگ استانادا ءوتىپ جاتقان Nobel fest فەستيۆالىنىڭ قۇرمەتتى قوناقتارىنىڭ ءبىرى. ءوز بايانداماسىندا ساراپشى سۋ تاپشىلىعى، جاسىل ەنەرگيا تاقىرىبىن قوزعادى، دەپ حابارلايدى قازاقپارات ءتىلشىسى.

Жасыл энергия
Фото: Фото: ҚазАқпарат

«سۋ جەتىسپەۋشىلىگى الەمدىك دەڭگەيدەگى ماڭىزدى پروبلەما. بۇل جەردە كليماتتىڭ وزگەرۋى ماسەلەسى ءتىپتى ناشارلاي تۇسەدى. بۇل ورتالىق ازيا ەلدەرىنە تەرىس اسەر ەتەدى. ماسەلەنى قالاي شەشۋگە بولادى؟ بۇل ساياسي جانە الەۋمەتتىك كونسەنسۋسقا بايلانىستى. قالاي بولعاندا دا، مەملەكەت سۋدى قايتا وڭدەۋ، سۋمەن قامتۋ، جاڭبىر سۋىن جيناۋ بويىنشا تولەم جۇرگىزۋ كەرەك. بۇل ادىستەر قازىردىڭ وزىندە قولجەتىمدى. تەك ەلدەر اقشا جيناۋدى، ينۆەستيتسيالاردى سۋ تاپشىلىعى ماسەلەلەرىن شەشۋگە قالاي باعىتتاۋ كەرەكتىگىن بىلمەيدى»، - دەدى راە كۆون چۋنگ ب ا ق وكىلدەرىنىڭ ساۋالىنا جاۋاپ بەرە تۇرىپ.

ونىڭ ايتۋىنشا، ادامدار سۋ پروبلەماسىن ۇكىمەت جانە بيزنەس وكىلدەرى شەشەدى دەپ كۇتەدى.

«تۇتىنۋشىلار جاۋاپكەرشىلىكتى سەزىنىپ جانە جاسىل ەنەرگيا ءۇشىن تولەۋگە دايىن بولۋى كەرەك. سول ءۇشىن دە مەن جاسىل تاريف ەنگىزۋدى، سۋ جانە جاسىل ەنەرگيا بويىنشا جوعارى باعانى قويۋدى ۇسىنامىن. ەكولوگيالىق اپاتتاردى تەك ۇكىمەت پەن بيزنەس شەشە المايدى، بۇل جەردە تۇتىنۋشىلار دا قاتىسۋ قاجەت. ادامدار ەنەرگيا، تازا سۋ جانە ازىق- تۇلىك ءۇشىن تولەۋگە دايىن بولۋى كەرەك. قازاقستان قازىردىڭ وزىندە سۋ تاپشىلىعىن، ادەتتەن تىس ىستىقتى، سۋ تاسقىنىن، ورمان ورتتەرىن باستان كەشۋدە. ءىستى قازىردەن قولعا الماسا ماسەلە سايىن ناشارلاي تۇسەدى»، - دەيدى ول.

ايتا كەتەيىك، استانادا ءداستۇرلى Nobel fest فەستيۆالى ءوتىپ جاتىر.

التىنشى رەت ۇيىمداستىرىلعان شاراعا ارنايى شاقىرىلعان نوبەل سىيلىعىنىڭ لاۋرەاتتارى، عالىمدار، بيزنەس وكىلدەرى قاتىسۋدا.

سوڭعى جاڭالىقتار