ادام ۇرلاعان الاياقتار توبى ۇستالدى
استانا قالاسى بويىنشا سىبايلاس جەمقورلىققا قارسى قىزمەت پروكۋراتۋرا تەرگەۋدى انىقتاعاننان كەيىن ا. ءاشىموۆ، ا. الەكسەيەۆ، ن. شايماردانوۆ جانە ا. باپانوۆتىڭ قىلمىسىن اشكەرەلەدى، دەپ حابارلايدى Kazinform انتيكورعا سىلتەمە جاساپ.
ولار الدىن الا ءسوز بايلاسىپ، وزدەرىن قۇقىق قورعاۋ ورگاندارىنىڭ قىزمەتكەرلەرى رەتىندە تانىستىرعان. ازاماتتى ۇرلاۋمەن قاتار، ەسىرتكى زاتتارىن ساقتاپ جانە قولدانعانى ءۇشىن قىلمىستىق جاۋاپكەرشىلىككە تارتامىز دەپ بوپسالاعان. سونداي-اق 1,4 ميلليون تەڭگەدەن استام سوما مۇلكىن يەمدەنگەن. توپتىڭ بارلىق قاتىسۋشىسى سوتتىڭ سانكتسياسىمەن قاماۋعا الىندى.
قازىرگى ۋاقىتتا ولاردىڭ ۇقساس قىلمىستارعا قاتىستىلىعى تەكسەرىلىپ جاتىر.
«وسى ادامداردىڭ قۇقىققا قايشى قىزمەتى تۋرالى اقپاراتىڭىز بولسا، سىبايلاس جەمقورلىققا قارسى قىزمەتتىڭ 1424 Call-ورتالىعىنا حابارلاۋدى سۇرايمىز. قىلمىستىق- پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى»،-دەلىنگەن حابارلامادا.
كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق- پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.
