ادام ءولىمى بيزنەسكە اينالدى. دەپۋتات مۇقايەۆ اس وتكىزەتىن مەشىتتەردى سىنادى
ءماجىلىس دەپۋتاتى داۋلەت مۇقايەۆ ىسىراپتىڭ الدىن الۋدى مەشىتتەردەن باستاۋعا شاقىردى، - دەپ حابارلايدى ماسساگەت.
دەپۋتاتتىڭ سوزىنشە، استىڭ ءمازىرىنىڭ باعاسى تويدىڭ داستارحانىنىڭ باعاسىمەن بىردەي.
«استانانىڭ باس مەشىتى مەن حازىرەت سۇلتان مەشىتىندەگى اسحانادا اس بەرەتىن بولساڭىز، ادام باسىنا 20000 تەڭگەگە دەيىن تولەۋگە دايىن بولىڭىز! ادام ولىمىندەگى اس ەمەس، توي جاسايتىن داستارحان! مينيمالدى باعا - 7000 تەڭگە. ءبىراق ول كەزدە ەتتى ءوزىڭىز اكەلەسىز. بۇل بيزنەس بولماعاندا نە؟» - دەپ اشىندى ول.
مۇقايەۆتىڭ ايتۋىنشا، شىعىس قازاقستان، اباي، پاۆلودار وبلىستارىندا داستارحاندا تەك 7-اق اس ءتۇرى بولادى، ودان باسقا ءمازىر جوق.
«نەگە باس قالادا، باسقا ايماقتاردا وسىلاي بولمايدى؟ ەرتە مە، كەش پە كەز كەلگەن ادام باسىنا ءولىم كەلەدى. ودان ەشكىم قۇتىلا المايدى. جەر الۋ، جانازا، اس بەرۋ، زيرات كوتەرۋ… وسىنىڭ ءبارى ءبىر كۇنى الدىڭىزدان شىعاتىن ءدىني جورالعىلار. قازاقستان مۇسىلماندار ءدىني باسقارماسى تاراپىنان بۇل ماسەلە دۇرىس جولعا قويىلماسا، قايعىدان قان جۇتىپ وتىرعان جاندارعا، اقشاسى جوقتارعا ودان سايىن سوققى بولىپ وتىر»، - دەدى ول.
ەسكە سالايىق، بۇعان دەيىن قىرعىزستان مۇسىلماندارىنىڭ ءدىني باسقارماسى مارقۇمنىڭ قوناق اسى، جەتىسى، قىرقى جانە قازادان كەيىن 52 كۇنىن وتكىزگەندە دە مال سويۋعا تىيىم سالعانى حابارلاندى. جاڭا ءپاتۋا بويىنشا ايىر قالپاقتى اعايىندار قايتىس بولعان ادامنىڭ ۇيىندە العاشقى ءۇش كۇن قازان كوتەرمەيدى.
كورشى ەلدىڭ ءمۇفتياتىنىڭ مالىمەتىنشە، بۇل كۇندەر ءۇي ءىشى ءۇشىن قارالى كۇن بولىپ سانالادى. ال داستارحان جايۋ، ەسكە الۋ ءراسىمىن كوڭىل ايتۋعا كەلگەن تۋىستارى مەن كورشىلەرى ۇيىمداستىرۋعا ءتيىس. كوڭىل ايتۋعا كەلگەندەرگە جاڭا كيىم-كەشەك، ورامال ۇلەستىرۋ دە ىسىراپقا جاتقىزىلىپ وتىر.
