ادام اقىل ءتىسىن جۇلسا، كۇشىنەن ايىرىلاتىنى راس پا؟
الەۋمەتتىك جەلى قولدانۋشىلارى اقىل ءتىستى جۇلماۋعا كەڭەس بەرىپ جاتىر. ولاردىڭ ايتۋىنشا، اقىل ءتىس ادامنىڭ كۇشى مەن الەۋەتىن اشۋ ءۇشىن قاجەت، ال ولار شىققان كەزدەگى ءتىستىڭ اۋرۋى - بۇل ناعىز سىي. مۇنىڭ ءبارى - جالعان اقپارات، - دەپ حابارلايدى Stopfake.kz.
اقىل ءتىس نەمەسە سەگىزىنشى تىستەر - بۇل ءار قاتارداعى ەڭ الىس تىستەردىڭ جۇپتارى. ادەتتە ولار 18-30 جاس ارالىعىندا شىعادى، ولاردىڭ ءسۇت تىستەرى بولمايدى. بۇل تىستەر ارعى اتالارىمىزعا قاجەت بولدى، ويتكەنى اۋىز قۋىسى گيگيەناسى ناشار جانە تاماقتانۋ ساپاسى تومەن بولعاندىقتان، ولاردىڭ تىستەرىنىڭ جارتىسى 20-30 جاسقا دەيىن ءتۇسىپ قالىپ وتىرعان. وسى جاستا شىعاتىن اقىل تىستەر پروبلەمانى ءىشىنارا شەشىپ، ادامدارعا تاماقتى شايناپ جەۋگە مۇمكىندىك بەردى. اقىل تىستەر جۇرەكپەن دە، دومالاق بەزبەن دە بايلانىستى ەمەس.
كەيدە اقىل تىستەر شىققاندا بەت ءىسىپ كەتەدى. بۇعان وسى تىستەردىڭ دۇرىس شىقپاۋى سەبەپ بولۋى ىقتيمال. ولار ادامنىڭ جاق سۇيەگى تولىعىمەن قالىپتاسقان كەزدە شىعادى، سوندىقتان اقىل تىستەرگە ورىن بولماي، ولار قيسىق نەمەسە كولدەنەڭ شىعادى.
ءوز كەزەگىندە بۇل قىزىل يەكتىڭ قابىنۋىنا جانە جانىنداعى تىستەردىڭ زاقىمدالۋىنا اكەلۋى مۇمكىن. بۇل رەتتە اقىل ءتىستى جۇلىپ تاستاۋ ۇسىنىلادى. الايدا شىققان ءتىس ىڭعايسىزدىق تۋدىرماسا جانە ءتىس جەگى بولماسا، ولاردى جۇلماۋعا دا بولادى، ونىمەن ءومىر بويى جۇرە الاسىز.
اقىل ءتىسى بار ادامدار ونى جۇلىپ تاستاعاندارعا قاراعاندا كۇشتى، اقىلدى جانە تابىستى ەكەنىن دالەلدەيتىن ستاتيستيكا جوق. دەمەك، اقىل ءتىستى ساقتاي وتىرىپ، شىنايى الەۋەتىڭىزدىڭ اشىلاتىنىن دالەلدەۋ مۇمكىن ەمەس.
ولاي بولسا، تارالعان اقپارات شىندىققا جاناسپايدى. اقىل تىستەر جۇرەكپەن دە، دومالاق بەزبەن دە بايلانىستى ەمەس، كەيبىر ادامدا ولاردى جۇلىپ تاستاۋعا سەبەپ بولماۋى مۇمكىن، ءبىراق ولاردى ساقتاپ قالىپ، كۇشتى ءارى تابىستى بولاتىنىڭىزعا دالەل جوق.
