ماڭعىستاۋدىڭ بەينەۋ اۋدانىندا ءبىر تۇندە 126 قوي قىرىلدى
اقتاۋ. KAZINFORM - ماڭعىستاۋ وبلىسىنىڭ بەينەۋ اۋدانىندا ءبىر تۇندە 126 قوي قىرىلىپ قالدى. الدىن الا مالىمەت بويىنشا، مال ءبىر جەرگە جينالعان جاڭبىر سۋىن ىشكەن.
ماڭعىستاۋ وبلىستىق ۆەتەريناريالىق باسقارماسى بەينەۋ اۋداندىق ۆەتەريناريالىق ستانتسياسىنىڭ باسشىسى نۇرالى ءسادىعۇلوۆتىڭ مالىمەتىنشە، وقيعا تۋرالى 28 -قىركۇيەكتە ساعات 10:00 شاماسىندا تۇرعىنداردان حابارلاما تۇسكەن. ماماندار وقيعا ورنىنا بارىپ، ولگەن مالدىڭ سانىن انىقتاعان.
- بۇل — 10 شاقتى وتباسىنىڭ مالى. قويلاردى ءبىر باقتاشى كەزەكپەن جايىلىمعا شىعارىپ وتىرعان. بارلىعى 210 قوي بولعان، ونىڭ 126 سى ءبىر تۇندە قىرىلىپ قالعان. قالعان 84 قويدىڭ جاعدايى جاقسى. جۇقپالى اۋرۋ بەلگىلەرى بايقالمايدى. قازىر ولار جايىلىمعا شىعارىلدى، - دەيدى مامان.
وقيعا ورنىنا اۋداندىق ۆەتەريناريالىق ستانتسيانىڭ ماماندارى بارىپ، ولگەن مالدان جانە قويلار سۋ ىشكەن جەردەن سۋ سىنامالارىن العان.
قازىر الىنعان سىنامالار اۋداندىق زەرتحاناعا تاپسىرىلدى. مالدىڭ قىرىلۋ سەبەبى زەرتحانالىق ساراپتامادان كەيىن بەلگىلى بولادى.
