ماڭعىستاۋداعى قايعىلى وقيعا تۋرالى جالعان اقپارات تاراتقاندار جازالاندى
استانا. KAZINFORM - پوليتسيا ماڭعىستاۋ وبلىسىندا بولعان توتەنشە جاعدايعا قاتىستى الەۋمەتتىك جەلىلەردە شىندىققا سايكەس كەلمەيتىن اقپارات تاراتقان بىرنەشە ازاماتتى انىقتادى، دەپ حابارلايدى Polisia.kz.
پوليتسيا مالىمەتىنشە، د. س. جانە گ. س. ەسىمدى ازاماتتار Facebook پاراقشالارىندا اسكەري قىزمەتشى ا. ا. -نىڭ سۋعا باتىپ بارا جاتقان جولداسىن قۇتقارىپ، ءوز بەتىمەن جاعاعا شىققانى تۋرالى اقپارات جاريالاعان. سونداي-اق ولار اسكەري قىزمەتشىنىڭ ەرلىگى مەن قۇتقارىلۋ جاعدايلارى قاساقانا جاسىرىلىپ وتىرعانى جونىندە مالىمەت تاراتقان.
تەكسەرۋ كەزىندە د. س. بۇل اقپاراتتى الىستاعى تۋىستارىنان العانىن ايتقان. ال گ. س. مالىمەتتى الەۋمەتتىك جەلىلەردەن كورىپ، شىنايىلىعىن تەكسەرمەستەن ءوز پاراقشاسىندا جاريالاعانىن تۇسىندىرگەن.
قورعانىس مينيسترلىگى اتالعان مالىمەتتەردى رەسمي تۇردە جوققا شىعاردى. ۆەدومستۆو اقپاراتى بويىنشا، اسكەري قىزمەتشى ا. ا. وقۋ-جاتتىعۋ كەزىندە جاعالاۋدا بولىپ، جوسپارعا سايكەس وزىنە جۇكتەلگەن مىندەتتەردى ورىنداعان. ونىمەن بىرگە مەرزىمدى اسكەري قىزمەتتەگى ماتروس م. ءا. بولعان. قازىر ەكى اسكەري قىزمەتشى دە اسكەري ءبولىم ورنالاسقان جەردە قىزمەتىن جالعاستىرىپ جاتىر.
- الەۋمەتتىك جەلىلەردە ا. ا. -نىڭ ءوز بەتىمەن جاعاعا ءجۇزىپ شىققانى، سۋعا باتىپ بارا جاتقان جولداسىن قۇتقارعانى جانە ونىڭ ەرلىگى تۋرالى اقپاراتتىڭ قاساقانا جاسىرىلىپ وتىرعانى جونىندە تاراعان مالىمەتتەر شىندىققا سايكەس كەلمەيدى، - دەلىنگەن حابارلامادا.
پوليتسيا بۇدان بولەك شىمكەنت قالاسىنىڭ تۇرعىنى س. ك. مەن كوكشەتاۋ قالاسىنىڭ تۇرعىنى ك. و.-نى انىقتادى.
س. ك. Facebook پاراقشاسىندا تاعى ءبىر اسكەري قىزمەتشىنىڭ قازا بولعانى، ونىڭ تۋىستارىنا قىسىم كورسەتىلىپ، ولاردان اقشا تالاپ ەتىلىپ وتىرعانى تۋرالى اقپارات جاريالاعان. ال ك. و. ماڭعىستاۋ وبلىسىندا تاعى ءبىر اسكەري قىزمەتشىنىڭ قازا بولعانى جونىندە مالىمەت تاراتقان. پوليتسيا بۇل اقپاراتتاردىڭ دا شىندىققا سايكەس كەلمەيتىنىن مالىمدەدى.
اكىمشىلىك ماتەريالداردى قاراۋ ناتيجەسىندە سوت شەشىمىمەن اتالعان تۇلعالار اكىمشىلىك جاۋاپكەرشىلىككە تارتىلىپ، 20 ا ە ك مولشەرىندە ايىپپۇل سالىندى.
پوليتسيا باسقا تۇلعالاردىڭ ماتەريالدارىن قايتا جاريالاۋ دا جاۋاپكەرشىلىكتەن بوساتپايتىنىن ەسكەرتتى. سونداي-اق الەۋمەتتىك جەلى قولدانۋشىلارىن اقپاراتتىڭ شىنايىلىعىن تەكسەرىپ، راستالماعان مالىمەتتەردى تاراتپاۋعا شاقىردى.
ايتا كەتەيىك، بۇعان دەيىن ماڭعىستاۋ وبلىسىندا اسكەري قىزمەتشىلەردىڭ قازا بولۋىنا بايلانىستى ەكى باپ بويىنشا قىلمىستىق ءىس قوزعالعانى حابارلانعان بولاتىن.
