ماڭعىستاۋ جۇرتى قازا تاپقان ساربازداردى سوڭعى ساپارعا شىعارىپ سالدى
استانا. KAZINFORM - بۇگىن ماڭعىستاۋ وبلىسىندا اسكەري بورىشىن وتەۋ كەزىندە قازا تاپقان اسكەري قىزمەتشىلەرمەن قوشتاسۋ ءراسىمى ءوتتى. بۇل تۋرالى وبلىستىق اكىمدىكتىڭ باسپا ءسوز قىزمەتى ءمالىم ەتتى.
قارالى راسىمگە ماڭعىستاۋ وبلىسىنىڭ اكىمى نۇرداۋلەت قيلىباي، قازاقستان رەسپۋبليكاسىنىڭ قورعانىس ءمينيسترى داۋرەن قوسانوۆ، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى، ۇلتتىق قۇرىلتاي مۇشەلەرى، «قازاقستان حالىق كەڭەسىنىڭ» مۇشەلەرى، سونداي-اق بەلگىلى قوعام قايراتكەرلەرى مەن مارقۇمدارمەن قىزمەتتەس بولعان ازاماتتار قاتىستى.
راسىمگە قاتىسۋشىلار قازا بولعان جاۋىنگەرلەردىڭ تۋعان-تۋىسى مەن جاقىندارىنا ورنى تولماس قايعىعا ورتاقتاسىپ، كوڭىل ايتتى. وتان قورعاۋشىلاردىڭ رۋحىنا قۇران باعىشتالىپ، قۇدايى راسىمدەر جاسالدى.
مەملەكەت باسشىسىنىڭ تاپسىرماسىنا سايكەس، قازا بولعان اسكەري قىزمەتشىلەردىڭ وتباسىلارىنا مەملەكەتتىك الەۋمەتتىك تولەمدەر، ماتەريالدىق قولداۋ جانە جانازا مەن جەرلەۋ راسىمدەرىن ۇيىمداستىرۋعا قاجەتتى جان-جاقتى كومەك كورسەتىلىپ جاتىر.
قاراجاتتى جيناقتاۋ ماقساتىندا ماڭعىستاۋ وبلىسىنىڭ اكىمدىگى تاراپىنان بۇعان دەيىن ارنايى قور ايقىندالعان بولاتىن.
- جيناقتالعان بارلىق قاراجات قازا بولعان اسكەري قىزمەتشىلەردىڭ وتباسىلارىنا جانە زارداپ شەككەندەرگە اتاۋلى ءارى اشىق تۇردە، مەملەكەتتىك جانە قۇقىق قورعاۋ ورگاندارىنىڭ قاتاڭ باقىلاۋىمەن باعىتتالادى. ماڭعىستاۋ وبلىسىنىڭ اكىمدىگى قازا بولعان اسكەري قىزمەتشىلەردىڭ وتباسىلارىنا، اتا-انالارى مەن جاقىندارىنا قايعىرىپ كوڭىل ايتادى، - دەلىنگەن حابارلامادا.
ايتا كەتەيىك، بۇعان دەيىن قورعانىس ءمينيسترى قارا جامىلعان وتباسىلارعا كوڭىل ايتقان بولاتىن.
ال كەشە ماڭعىستاۋ وبلىسىندا قىزمەتتىك مىندەتىن اتقارۋ كەزىندە قازا تاپقان اسكەري قىزمەتشى، اعا لەيتەنانت ولجاس مۇحتار ۇلىنىڭ دەنەسى تۇركىستانعا جەتكىزىلگەن ەدى.
