اعىلشىندىق كلۋبتىڭ 17 جاستاعى ويىنشىسى گول سوعىپ، رەكورد جاسادى
استانا. KAZINFORM - فۋتبولدان ەۋروپا ليگاسىنداعى جالپى كەزەڭدەگى ماتچتار مارەسىنە جەتتى.

اعىلشىندىق «توتتەنحەم» كلۋبىنىڭ شابۋىلشىسى ميكي مۋر ءىرى ەۋروپالىق جارىستا 17 جاسىندا گول سوققان ەڭ جاس ويىنشى اتاندى.
م. مۋر ەۋروپا ليگاسى جالپى كەزەڭىنىڭ 8-تۋرىندا شۆەتسيالىق «ەلفسبورگ» كلۋبىمەن ويىندا 94-مينۋتتا ەسەپتى 3:0-گە جەتكىزدى. ول تۋعانىنا 17 جاس 172 كۇن بولعاندا، اعىلشىن ويىنشىلارى اراسىندا وسىنداي رەكوردتىق ناتيجەگە قول جەتكىزدى.
بۇدان بۇرىنعى ۇزدىك ناتيجە دجيممي گريۆزگە (17 جاس 245 كۇن) تيەسىلى ەدى. ول 1957 -جىلى «چەلسي» قۇرامىندا كوزگە تۇسكەن بولاتىن.
لوندوندىق «توتتەنحەم» ەۋروپا ليگاسىنىڭ جالپى كەزەڭىنىڭ قورىتىندىسى بويىنشا 17 ۇپاي جيناپ، ءتورتىنشى ورىنعا تابان تىرەدى. «ەلفسبورگ» ۇزدىك 24 كوماندانىڭ قاتارىنا ىلىگە المادى.
العاشقى ۇشتىكتەن «لاتسيو» (يتاليا)، «اتلەتيك» (يسپانيا)، «مانچەستەر يۋنايتەد» (انگليا) كورىنسە، «اينتراحت» (گەرمانيا)، «ليون» (فرانسيا)، «وليمپياكوس» (گرەكيا)، «رەيندجەرس» (شوتلانديا) 1/8 فينالعا بىردەن جولداما الدى.
تۇركيانىڭ «گالاتاساراي»، «فەنەرباحچە» كلۋبتارى 1/8 فينال جولداماسى ءۇشىن كۇرەسۋگە مۇمكىندىك بەرەتىن توپ-24-كە ەندى. ال قازاقستان ۇلتتىق قۇراماسىنىڭ ويىنشىسى باقتيەر زاينۋتدينوۆ ونەر كورسەتەتىن «بەشيكتاش» كومانداسى سوڭعى تۋردا نيدەرلاندىلىق «تۆەنتەدەن» 0:1 ەسەبىمەن جەڭىلىپ، جالپى كەستەدە 28-ورىنعا ءتۇسىپ قالدى. بۇل ويىندا ب. زاينۋتدينوۆ قوسالقى قۇرامدا بولدى.
ەسكە سالا كەتەيىك، بۇدان بۇرىن چەمپيوندار ليگاسىندا رەكوردتىق ناتيجە تىركەلگەنىن جازعان بولاتىنبىز.
اۆتور
عايساعالي سەيتاق