اۋعانستان پاكىستاننان كەلگەن 28 سودىردىڭ كوزىن جويعانىن مالىمدەدى
استانا. kazinform - اۋعانستان قورعانىس مينيسترلىگى نۋريستان پروۆينتسياسىنىڭ شىعىسىندا 28 قارۋلى جاۋىنگەردىڭ كوزى جويىلعانىن مالىمدەدى.
كابۋلدىڭ دەرەگىنشە، ولار پاكىستان اۋماعىنان شەكارا ارقىلى وتكەن، دەپ حابارلايدى Al Jazeera.
اۋعانستاننىڭ قورعانىس مينيسترلىگى قاقتىعىس 27-قىركۇيەك، جەكسەنبى كۇنى بولعانىن حابارلادى.
مينيسترلىكتىڭ مالىمەتىنشە، قازا تاپقانداردىڭ باسىم بولىگى اۋعانستاننىڭ بۇرىنعى ۇكىمەتى تۇسىندا كۇشتىك قۇرىلىمداردا قىزمەت ەتكەن. اۋعانستان بيلىگى ولاردى پاكىستان ارنايى قىزمەتتەرى جالداعان دەپ وتىر. قازا تاپقانداردىڭ اراسىندا «يسلام مەملەكەتى» (يگيل) تەرروريستىك ۇيىمىنىڭ سودىرلارى دا بولعانىن مالىمدەدى.
پاكىستان بيلىگى بۇل ايىپتاۋلاردى جوققا شىعارىپ، ولاردى نەگىزسىز ءارى شىندىققا جاناسپايدى دەپ اتادى.
پاكىستاننىڭ اقپارات جانە حابار تاراتۋ مينيسترلىگى ەلدىڭ كۇشتىك قۇرىلىمدارى مەن بارلاۋ ورگاندارى نۋريستانداعى قاقتىعىسقا قاتىسپاعانىن مالىمدەدى. سونداي-اق ولار اۋعانستاننىڭ بۇرىنعى كۇشتىك قۇرىلىمدارىنىڭ وكىلدەرىن جالداۋمەن، دايارلاۋمەن نەمەسە قارۋلى توپتارعا قولداۋ كورسەتۋمەن اينالىسپاعانىن ايتتى.
ءوز كەزەگىندە يسلاماباد اۋعانستان بيلىگىن پاكىستان تاراپىنىڭ مالىمدەۋىنشە، اۋعانستان اۋماعىنان ارەكەت ەتىپ جاتقان تەرروريستىك ۇيىمدارعا قارسى شارا قابىلداۋعا شاقىردى.
ەسكە سالايىق، بۇعان دەيىن اۋعانستاننىڭ شىعىس پروۆينتسيالارىندا پاكىستاننىڭ اۋە شابۋىلىنان ءۇش بەيبىت تۇرعىن قازا تاۋىپ، تاعى تورتەۋى جارالانعان بولاتىن.
