اۋعانستانداعى اتىستان ءۇش اۋعانستاندىق جانە ءۇش يسپانيالىق ازامات وققا ۇشتى
استانا. KAZINFORM - اۋعانستاننىڭ ورتالىعىنداعى باميان قالاسىندا اتىس بولىپ، ءۇش اۋعانستاندىق جانە ءۇش يسپانيالىق ازامات وققا ۇشتى. بۇل تۋرالى بەلتا اقپارات اگەنتتىگى جازدى.
Al Jazeera اگەنتتىگىنىڭ حابارلاۋىنشا، بازاردا جۇرگەن ادامدارعا وق اتىلعان.
اۋعانستان ىشكى ىستەر مينيسترلىگىنىڭ باسپا ءسوز حاتشىسى ابدۋل ماتين كاني اتىستان زارداپ شەككەندەر مەن قازا تاپقانداردىڭ دەنەلەرى كابۋلعا جەتكىزىلگەنىن ايتتى. سونداي-اق ول جارالانعان 8 ادامنىڭ 4 ەۋى - شەتەل ازاماتى ەكەنىن جەتكىزدى.
جەرگىلىكتى تەلەارنا اقپارات كوزدەرىنىڭ حابارلاۋىنشا، جاراقات العاندار نورۆەگيا، اۋستراليا، ليتۆا جانە يسپانيادان كەلگەن.
ۆەدومستۆو وكىلى وقيعاعا قاتىستى تەرگەۋدىڭ جالعاسىپ جاتقانىن جانە 7 كۇدىكتىنىڭ قاماۋعا الىنعانىن تىلگە تيەك ەتتى. ازىرگە ەشبىر قىلمىستىق توپ شابۋىل جاساعانىن مويىنداماعان.
«اۋعانستاندا يسپانيالىق تۋريستەردىڭ قازا تاپقانى تۋرالى جايسىز حابار ەل تۇرعىندارىنىڭ ەڭسەسىن ءتۇسىردى»، - دەپ جازدى يسپانيا پرەمەر-ءمينيسترى پەدرو سانچەس X الەۋمەتتىك جەلىسىندەگى پاراقشاسىندا.
يسپانيا سىرتقى ىستەر ءمينيسترى حوسە مانۋەل البارەس قۇربانداردىڭ دەنەلەرى جەكسەنبى كۇنى يسپانياعا جەتكىزىلۋى مۇمكىن ەكەنىن اتاپ ءوتتى.
ايتا كەتەيىك، باميان - اۋعانستانداعى تانىمال تۋريستىك قالا. كوپتەگەن تۋريست بۇل جەرگە بۋددا مۇسىندەرىن كورۋ ءۇشىن كەلەدى.
