اۋعانستاندا سوڭعى 45 جىلدا العاش رەت ۇلتتىق حالىق ساناعى جۇرگىزىلەدى

استانا. KAZINFORM - اۋعانستان بيلىگى 1979 -جىلدان بەرى العاش رەت ۇلتتىق حالىق ساناعى ناۋقانىن وتكىزۋگە نيەتتى جانە بۇل ماسەلە اۋعانستان مينيسترلەر كابينەتىنىڭ وتىرىسىندا باستى ماسەلە بولدى، دەپ حابارلايدى ر ي ا نوۆوستي.

دۇيسەنبى كۇنى پرەمەر-مينيستر مۇحاممەد حاسان احۋندتىڭ توراعالىعىمەن وتكەن وتىرىستا جالپىۇلتتىق ساناقتى وتكىزۋدىڭ ۇسىنىلىپ وتىرعان نەگىزدەرى تالقىلاندى.

- مينيسترلەر كابينەتى ۇلتتىق ستاتيستيكا جانە اقپارات اگەنتتىگىنە (NSIA) حالىق ساناعى جوسپارىنىڭ جوباسىن مۇقيات زەردەلەۋدى جانە ۇكىمەتتىڭ كەلەسى وتىرىسىنا قورىتىندى ەسەپتى ۇسىنۋدى تاپسىردى، - دەلىنگەن حابارلامادا.

NSIA ديرەكتورى ابدۋل قادىرگە ۇسىنىستى باعالاۋ جانە ساناق جوسپارى تۋرالى جان-جاقتى ەسەپ دايىنداۋ ءۇشىن ارنايى كەڭەس شاقىرۋ تاپسىرىلدى.

اۋعانستان بويىنشا ناقتى دەموگرافيالىق دەرەكتەر، سونىڭ ىشىندە ءارتۇرلى ەتنيكالىق جانە الەۋمەتتىك توپتار جايلى انىق مالىمەتتەر جوق. NSIA مالىمەتتەرى بويىنشا، 2023-24 -جىلدارى اۋعانستان حالقىنىڭ سانى 35,7 ميلليونعا جەتكەن بولۋى مۇمكىن. الايدا، ب ۇ ۇ-نىڭ كەيبىر ينستيتۋتىنىڭ باعالاۋى بويىنشا، 41,4 ميلليون ادامعا جەتۋى مۇمكىن.

اۋعانستانداعى سوڭعى ۇلتتىق حالىق ساناعى 1979 -جىلى جۇرگىزىلدى جانە قاۋىپسىزدىك ماسەلەسىنە بايلانىستى ەل اۋداندارىنىڭ %67 ىن عانا قامتىدى، ول ەلگە كەڭەس اسكەرلەرىنىڭ شەكتەۋلى كونتينگەنتىنىڭ كىرۋىمەن ءۇزىلدى.

ەسكە سالا كەتەيىك، اۋعانستانداعى دەنساۋلىق ساقتاۋ مەكەمەلەرىنىڭ %80 ى جابىلۋى مۇمكىن.

اۆتور

بەگابات ۇزاقوۆ