ابىلاي حان ارعىماعىن قالاي اتاعان؟

ارينە، تاريحتا يەسىمەن بىرگە اتى قالعان تۇلپارلار قازاقتا بارشىلىق. تىزبەكتى سوناۋ قوبىلاندى باتىردىڭ تايبۋرىلىنان باستاۋعا بولادى. ول تايبۋرىلدىڭ جۇيرىكتىگى سونشا، قىرىق كۇنشىلىك جولدى ءبىر كۇندە جەلىپ وتەتىن بولسا كەرەك. جەردە ەمەس، ونىڭ تۇياعى كوكتە قالقىپ جۇرگەندەي بولعانىن وقىپ وتىرعان مىنا بىزدەر سەزىنىپ كەتەمىز.

ال ەندى ودان بەرگى زاماندارعا كەلسەك، ابىلايدىڭ ارعىماعى نارقىزىل دەگەن اتقا يە بولسا، قابانبايدىڭ - قۇباس، بوگەنبايدىڭ - اق كەكىل، ولجابايدىڭ - تايكوك، يساتاي باتىردىڭ اۋىزدىعىن شايناعان تۇلپارى اقتابان اتالسا كەرەك. سونداي- اق بىزگە بەلگىلى ارعىماقتاردىڭ تاعى بىرى - داۋلەتكەرەي كۇيشىنىڭ كەرتورىسى، جاسىبايدىڭ قويانكوگى.

جالپى، قازاق جىلقىسىنىڭ تاريحى، جىلقىعا قاتىستى بارلىق جايتتاردى وقىپ-بىلەم دەگەن وقىرمانعا بىلتىر « الماتى كىتاپ» باسپاسىنان تاريحشى احمەت توقتابايدىڭ « قازاق جىلقىسىنىڭ تاريحى» اتتى كولەمدى ەنسيكلوپەديالىق كىتابى جارىق كورگەنىن ايتقىمىز كەلەدى. ول كىتاپ - تاريحشىنىڭ 20 جىلدىق ەڭبەگىنىڭ جەمىسى.