ابايلىق جاستار روبوت تەحنيكاسىنان قىتايدا وتكەن چەمپيوناتتا بەدەلدى ماراپاتقا يە بولدى

استانا. قازاقپارات  - 18-19-مامىردا شاڭحايدا FIRST Tech Challenge جاھاندىق روبوتوتەحنيكا ليگاسى اياسىندا The CaoLu Cup Teenage Robot Design and Build Invitational Tournament جابىق ۇلتتىق چەمپيوناتى ءوتتى. وعان قىتايدىڭ 300-گە جۋىق مىقتى روبوتشىلارى مەن قازاقستاننان شاقىرىلعان «تەنگري» كومانداسى قاتىستى.

ەل نامىسىن اباي وبلىسى سەمەي قالاسىنداعى №5-شاكارىم اتىنداعى كوپسالالى گيمنازيانىڭ 7-سىنىپ وقۋشىلارى: وسمان قۋانىشبەك، تەمىرلان ابىلايحان، بالجان نايمانعازينا، نۇركەن تولەۋبەك، نۇرتورە ماقساتوۆ، رادمير جەڭىسبەك، دوسجان ءسابيت جانە الان ەرمەكبايەۆ قورعادى.

كوماندا جاتتىقتىرۋشىسى - ايدوس تۇرسىنبەكوۆ.

ەكى كۇندىك بايقاۋدىڭ قورىتىندىسى بويىنشا قازاقستاندىق وقۋشىلار «Motivate Award» نوميناتسياسىندا جەڭىسكە جەتتى.

«ءبىزدىڭ وقۋشىلار قىتايدىڭ ۇزدىك كوماندالارىمەن سايىسقا ءتۇستى. بۇل ۇلكەن تاجىريبە الماسۋ بولدى. بالالار جاس ەرەكشەلىگىنە جانە تىلدىك قيىندىققا قاراماستان، روبوت ويىنىندا وتە جاقسى ونەر كورسەتتى. شاكىرتتەرىمنىڭ تاباندىلىعىن ماقتان تۇتامىن»، - دەيدى جاتتىقتىرۋشى.

ەستەرىڭىزگە سالا كەتەيىك، كوماندا وقۋ- اعارتۋ مينيسترلىگىنىڭ قولداۋىمەن USTEM Foundation قورى مەن «دارىن» رەسپۋبليكالىق عىلىمي- پراكتيكالىق ورتالىعى ۇيىمداستىرعان استانادا وتكەن ورتالىق ازيا چەمپيوناتىندا جوعارى ناتيجە كورسەتىپ، چەمپيوناتقا جولداما العان بولاتىن.

اۆتور
ايدار وسپاناليەۆ