ابايدىڭ ءوزى ايتىپ تۇرعانداي: قازاق جىگىتى وزبەكستانداعى بايقاۋدا ءادىلقازىلاردى تاڭ قالدىردى
استانا. KAZINFORM – قازاقستاندىق ءداستۇرلى ءانشى اسقار مۇقيات وزبەكستانداعى «OVOZ The Voice» جوباسىندا ابايدىڭ ءانىن ورىنداپ، ءادىلقازىلاردىڭ جوعارى باعاسىن الدى، دەپ حابارلايدى Skifnews.kz اقپارات پورتالى.
مۋزىكالىق سايىستان ءۇزىندىنى ءداستۇرلى ءانشىنىڭ ءوزى Instagram جەلىسىندەگى پاراقشاسىندا جاريالادى.
بۇل جولى اباي قۇنانباي ۇلىنىڭ ولەڭىنە جازىلعان سىدىق مۇحامەتجانوۆتىڭ «جارىق ەتپەس قارا كوڭىلىم نە قىلسادا» ءانىن ورىنداپ ەدىم.
ءوزىمدى ءوزىم تۇسىنە المايمىن ءوز ورىنداۋىم وزىمە ەشقاشان ۇناعان ەمەس… - دەپ جازدى استىنا اسقار مۇقيات.
وزبەكستان رەسپۋبليكاسىندا ءوتىپ جاتقان حالىقارالىق «OVOZ The Voice» جوباسىندا قازاقستان اتىنان باق سىناعان ءانشىنىڭ ونەرىن وزبەكستان رەسپۋبليكاسىنىڭ حالىق ءارتىسى فاررۋح زاكيروۆ، مادەنيەت جانە تۋريزم ءمينيسترى وزادبەك نازاربەكوۆ، تانىمال ءانشى سيەۆارا نازارحان، توحير سوديكوۆ سىندى ونەر مايتالماندارى باعالادى.
قازاقستاندىق ءداستۇرلى ءانشى ورىنداۋى ءالى دە وزىنە ۇنامايتىنىن، الدا كوپ جۇمىس ىستەۋ كەرەك ەكەنىن اتاپ ءوتتى.
الايدا وزبەكستاندىق ءادىلقازىلار اسقار مۇقياتتىڭ ورىنداۋ شەبەرلىگىنە ءتانتى بولدى. «قازاقتاردا مۇنداي كەرەمەت داۋىس وتە كوپ. ءسىز - سونىڭ جارقىن ۇلگىسىسىز»، «ماعان ءسىزدىڭ ءاندى جەتكىزگەنىڭىز ۇنادى. ءدال قازىر ءسىزدى باسقا قازاقستاندىق انشىلەرمەن سالىستىرا المايمىن. وسى ءان ارقىلى ەرەكشەلەنىپ تۇرسىز»، «بۇل ءان سىزگە جاراسادى»، - دەدى ءادىلقازى مۇشەلەرى.
