اباي وبلىسىنىڭ حالقى كومىر باعاسىنىڭ قىمباتتىعىنا شاعىمداندى

سەمەي. KAZINFORM - اباي وبلىسىنىڭ تۇرعىندارى كومىر باعاسىنىڭ تىم قىمباتتىعىن ايتىپ شاعىمدانىپ جاتىر. شالعايداعى اۋىل حالقىنا تىپتەن قيىن.

ءوڭىردىڭ شالعاي اۋىلدارىندا بيىل كومىر باعاسى تاعى قىمباتتادى. جاڭادان قۇرىلعان اقسۋات اۋدانىنىڭ تۇرعىندارى قاتتى وتىندى تام- تۇمداپ ساتىپ الۋعا ءماجبۇرمىز دەپ شاعىمداندى.

سەبەبى اقشالارى كومىردى بىردەن قاجەتتى كولەمدە ساتىپ الۋعا جەتپەي قالادى.

«كومىر باعاسى تىم قىمبات. بىلتىر تونناسى 28 مىڭ تەڭگە تۇرسا، وسى جىلى 30 مىڭعا جەتتى. نەگە قىمباتتاي بەرەدى؟ قالتامىزدى ابدەن قاقتى. اۋىلدا حالىقتىڭ تابىسى تومەن. مالدان باسقا كۇنكورىس جوق»، - دەيدى اقسۋات اۋىلىنىڭ تۇرعىنى قايرات ساعىندىقوۆ.

بۇگىندە اقسۋات اۋدانىندا 19 مىڭنان استام ادام تۇرادى. جەرگىلىكتى جۇرتقا جىلىتۋ ماۋسىمىندا بارلىعى 25 مىڭ تونناعا جۋىق قاتتى وتىن قاجەت.

«كومىردىڭ باعاسى بىرنەشە فاكتورعا بايلانىستى بەكىتىلەدى. ونىڭ ىشىندەگى ەڭ باستىسى - لوگيستيكا. جەكە تاسىمالداۋشىلار كومىردى جارما اۋدانىنان ءوز قاراجاتىنا 500 شاقىرىم جەردەگى اقسۋاتقا جەتكىزەدى. سوندىقتان جول شىعىندارى كومىر باعاسىنا قوسىلادى. دەسە دە باعانىڭ قىمباتتاۋىن تەجەۋ ءۇشىن جەتكىزۋشىلەرمەن كەلىسسوزدەر جۇرگىزىپ جاتىرمىز»، - دەيدى اقسۋات اۋدانى اكىمىنىڭ مىندەتىن اتقارۋشى ەرسىن ەسكەندىروۆ.

ەسكە سالساق، وسىعان دەيىن ونەركاسىپ مينيسترلىگى ەۋروپا مەن كورشىلەس مەملەكەتتەردە كومرىدىڭ قۇنى قازاقستانمەن سالىستىرعاندا ەكى ەسە قىمبات ەكەندىگىن حابارلاعان.

اۆتور
تالعاتجان مۇحامەتبەك ۇلى