اباي وبلىسىندا وقۋشى مىڭعا جۋىق اسىق جيناعان

استانا. قازاقپارات - ءۇش جىل ىشىندە قويدىڭ، توقتىنىڭ جانە ەشكىنىڭ 902 اسىعىن جيناعان.

асық
ۆيدەودان سكرينشوت

اباي وبلىسى اقسۋات اۋدانىندا 7-سىنىپ وقۋشىسى مىڭعا جۋىق اسىق جيناعان. 

24.kz ارناسى ءتىلشىسىنىڭ حابارلاۋىنشا، امانتاي نۇرايان ءۇش جىل ىشىندە قويدىڭ، توقتىنىڭ جانە ەشكىنىڭ 902 اسىعىن جيناعان. ەندى بۇل ساندى 1000 عا جەتكىزۋدى جوسپارلاپ وتىر.

قوجاگەلدى باتىر اتىنداعى مەكتەپتىڭ 7-سىنىپ وقۋشىسى نۇرايانعا اسىق اتۋدى اعاسى ۇيرەتكەن. ءۇش جىل بۇرىن ۇلتتىق ويىنعا قىزىعۋشىلىعى ارتىپ، اسىق جيناي باستاعان. قولى قالت ەتە قالسا دوستارىمەن اسىق ويناپ، ساقا جاساعاندى جاقسى كورەدى.

- بۇل جەردە ءبىز جۇگىرەمىز، سەكىرەمىز، كوزدەيمىز، اتامىز. ۇتامىز، كەيدە ۇتىلامىز. ويىن بولعان سوڭ باسەكەگە تۇسەمىز. اعام ماعان سەگىز جاسىمدا اسىق ويناۋدى ۇيرەتتى. سوسىن مەن وزىمە ۇناعان اسىقتاردى جيناپ باستادىم. سودان ءۇش جىلدىڭ ىشىندە 902 اسىق جينادىم، - دەيدى نۇرايان امانتاي.

سوڭعى جاڭالىقتار