اباي وبلىسىندا كوشى-قون زاڭناماسىن بۇزعان رەسەيلىك ەلدەن شىعارىلدى

سەمەي. KAZINFORM - اباي وبلىسىندا كوشى-قون زاڭناماسىن بۇزعان ازامات ەلدەن شىعارىلدى.

Polisia.kz-تىڭ مالىمەتىنشە، جىل باسىنان بەرى اباي وبلىسىندا قازاقستان رەسپۋبليكاسىنىڭ ازاماتتىعىن جوعالتۋدىڭ ءۇش جاعدايى تىركەلگەن. بارلىق قۇقىق بۇزۋشى جاۋاپكەرشىلىككە تارتىلىپ، ەلدەن شىعارىلدى.

ولاردىڭ ءبىرى - بورودۋليحا اۋدانىنىڭ 24 جاستاعى تۇرعىنى. ول كوشى-قون زاڭناماسىنىڭ تالاپتارىن ورىنداماعانى ءۇشىن جاۋاپكەرشىلىككە تارتىلدى. ميگراتسيالىق قىزمەت جۇرگىزگەن تەكسەرىس بارىسىندا ونىڭ رەسەي فەدەراتسياسىنىڭ ازاماتتىعىن العانى، ءبىراق بەلگىلەنگەن مەرزىمدە قازاقستان رەسپۋبليكاسىنىڭ قۇجاتتارىن تاپسىرماعانى انىقتالدى. سول سەبەپتەن ونىڭ پاسپورتى مەن جەكە كۋالىگى تاركىلەنىپ، ازاماتتىعىن جوعالتۋ ءراسىمى رەسمي تۇردە تىركەلدى. سونىمەن قاتار ول اكىمشىلىك قۇقىق بۇزۋشىلىق تۋرالى كودەكستىڭ 496-بابىنىڭ 2-بولىگىنە سايكەس اكىمشىلىك جاۋاپكەرشىلىككە تارتىلىپ، ەلدەن شىعارىلدى.

ەسكە سالامىز، قازاقستان رەسپۋبليكاسىندا قوس ازاماتتىققا تىيىم سالىنعان. شەتەل مەملەكەتىنىڭ ازاماتتىعىن العان تۇلعالار 30 كۇنتىزبەلىك كۇن ىشىندە ميگراتسيالىق قىزمەتكە حابار بەرىپ، قازاقستان رەسپۋبليكاسىنىڭ قۇجاتتارىن تاپسىرۋعا مىندەتتى. بۇل تالاپتى ورىنداماۋ اۋىر سالدارعا اكەلۋى مۇمكىن.

ەسكە سالا كەتەيىك، بۇعان دەيىن اباي وبلىسىندا ءتورت كۇندە ماس كۇيدە كولىك ايداعان 11 ادام ۇستالعانىن جازعان ەدىك.