اباي وبلىسىندا ايۋ مالدى قىرىپ جاتقانى جايلى جالعان اقپارات تاراۋدا
سەمەي. KAZINFORM - اباي وبلىسىنداعى «تارباعاتاي» مەملەكەتتىك ۇلتتىق تابيعي پاركىندەگى ايۋ ءۇرجار اۋىلىنداعى اۋىل حالقىنىڭ مالىن قىرىپ جاتقانى جايلى جالعان اقپارات تاراۋدا.
بۇگىن الەۋمەتتىك جەلىدە «تارباعاتاي» مەملەكەتتىك ۇلتتىق تابيعي پاركىندەگى ايۋدىڭ سول ماڭداعى ءۇرجار اۋدانىنداعى اۋىلداردىڭ حالقىنا مازا بەرمەي، مالدى قىرىپ جاتقاندىعى تۋرالى جازبا جاريالانعان. ۆيدەودا بىرنەشە اتتى ادامنىڭ سيىرعا شاپقان ايۋدى قۋىپ جۇرگەندىگىن كورۋگە بولادى.
«بۇل اباي وبلىسى ءۇرجار اۋدانىنا قاراستى اۋىل حالقىنىڭ جانايقايى. قىرىلىپ جاتقان مالدىڭ وتەمى قالاي بولادى؟ وسى تاۋعا ۇلتتىق پاركتىڭ قاجەتى بار ما؟ حالىق مالىن باعۋعا جەر تاپپاي وتىر»، - دەپ جازادى جاريالانىم اۆتورى.
انىق- قانىعىن ءبىلۋ ءۇشىن Kazinform ءتىلشىسى «تارباعاتاي» مەملەكەتتىك ۇلتتىق تابيعي پاركى» ر م م ديرەكتورى ايدىن سەركەبايەۆقا حابارلاسىپ كوردى.
«بۇل جالعان اقپارات. ۆيدەوداعى وقيعا بىزدە بولماعان. قىتايداعى جاعداي. ول ۆيدەوداعى تاۋدا قىلقان جاپىراقتى وسىمدىكتەر ءوسىپ تۇر. ال ءبىزدىڭ ۇلتتىق پاركتەگى تاۋلاردا ونداي اعاش مۇلدە جوق. سوندىقتان جۇرتتى جالعان اقپاراتقا سەنبەۋگە، ونى تاراتپاۋعا شاقىرامىن»، - دەپ ءتۇسىندىردى ول.
