اباي اتىنداعى قازاق ۇلتتىق وپەرا جانە بالەت تەاترىنا جاڭا باسشى كەلدى

الماتى. KAZINFORM – ق ر مادەنيەت جانە اقپارات ءمينيسترى ايدا عالىم قىزى بالايەۆانىڭ بۇيرىعىمەن اباي اتىنداعى قازاق ۇلتتىق وپەرا جانە بالەت تەاترى ديرەكتورىنىڭ مىندەتىن اتقارۋشى لاۋازىمىنا اينۇر سايلاۋباي قىزى كوپباساروۆا تاعايىندالدى.

تەاتردىڭ باسپا ءسوز قىزمەتى جاڭا باسشىنى تەاتر ۇجىمىنا مادەنيەت جانە اقپارات ۆيتسە-ءمينيسترى ەربول ءالىقۇلوۆ تانىستىرعانىن حابارلادى. قۇتتىقتاۋ ءسوز العاندار قاتارىندا وپەرا ترۋپپاسىنىڭ كوركەمدىك جەتەكشىسى بولات بوكەنوۆ ۇجىم اتىنان اينۇر سايلاۋباي قىزىنا ءوزىنىڭ تىلەگىن بىلدىرە كەلە، الداعى ىسىنە ساتتىلىك تىلەدى.

ايتا كەتەيىك، اينۇر سايلاۋباي قىزى كوپباساروۆا - 1975 -جىلى 7-اقپاندا دۇنيەگە كەلگەن.

1990-1995 -جىلدارى جامبىل پەداگوگيكالىق ينستيتۋتىندا (تاراز قالاسى) فيلولوگيا ماماندىعى بويىنشا ءبىلىم العان. 1995-1996 -جىلدارى ءال-فارابي اتىنداعى قازاق ۇلتتىق ۋنيۆەرسيتەتىندە (الماتى قالاسى) ماگيستراتۋرانى؛ 1996-1999 -جىلدارى ءال-فارابي اتىنداعى قازاق ۇلتتىق ۋنيۆەرسيتەتىندە اسپيرانتۋرانى بىتىرگەن.

2010-2021 -جىلدارى «Idea Fabric» ج ش س-دا باس پروديۋسەر بولعان. 2022 -جىلى تامىز ايىنان باستاپ «تۇركىستان مۋزىكالىق دراما تەاترى» م ك ق ك كوركەمدىك جەتەكشى، 2021-2022 -جىلدارى «تۇركىستان مۋزىكالىق دراما تەاترى» م ك ق ك ديرەكتور، كوركەمدىك جەتەكشى بولدى.

«قۇرمەت» وردەنى، «قازاقستان تاۋەلسىزدىگىنە 30 جىل» توسبەلگىسى، «ق ر مادەنيەت سالاسىنىڭ ۇزدىگى» مەدالى، «قۇرمەت» گراموتاسى، ق ر پرەزيدەنتىنىڭ العىس حاتىمەن ماراپاتتالعان.

اۆتور

دۋمان ارعىنگەلدى