اباي اتام دا ناماز وقىماعان: مۇحتار ماعاۋين سوڭعى سۇحباتىندا ءدىن جايلى نە دەپ ايتقان؟

ول ورانىپ، تۇمشالانىپ الاتىن قىز-كەلىنشەكتەردى دە سىناپ تاستادى. جازۋشى حيدجاب كيۋدى ۇلتقا قارسى جاسالعان قاستاندىق دەپ سانايدى.

مارقۇم مۇحتار ماعاۋين رامازان ايىندا دا ورازا ۇستاماعان. ورازا ءوزىنىڭ جازۋشىلىق ونەرىنە بوگەت بولادى دەپ ويلاعاندىقتان ەشقاشان اۋىز بەكىتپەگەن، دەپ جازادى Skifnews.kz اقپارات پورتالى.

جازۋشى، ءوزىنىڭ ۇلتىنا دەگەن، الەمگە دەگەن كوزقاراسى 18-19 جاسىمدا قالىپتاسىپ بولعانىن دا ايتتى. ماعاۋين الەم ادەبيەتىن 20 جاسىنا دەيىن وقىپ تاستاعان.

«18-19 جاستا كوزقاراسىم بولدى. 20 جاسىمدا ازامات رەتىندە قالىپتاسىپ بولدىم دەپ ويلايمىن. كەيىنگى ۇلكەن شىعارمالارىنا جوسپاردى سول كەزدە جازىپ قويعانمىن. كوزقاراسىم ەشقاشان وزگەرگەن ەمەس. دۇنيە كوزقاراس، دىنگە كوزقاراس، ۇلتتىق ماسەلەگە كوزقاراس 20 جاسىمدا تۇراقتادى»، - دەدى ماعاۋين.

جازۋشى سۇحباتىندا قازاقتىڭ ۇلى اقىنى ابايدىڭ ناماز وقىماعانىن جەتكىزدى. ول ورانىپ، تۇمشالانىپ الاتىن قىز-كەلىنشەكتەردى دە سىناپ تاستادى. جازۋشى حيدجاب كيۋدى ۇلتقا قارسى جاسالعان قاستاندىق دەپ سانايدى.

«ءدىن دەگەن جۇرەكتە بولۋ كەرەك. مەن ناماز وقىمايمىن. اباي اتام دا ناماز وقىماعان، ءدىن جۇرەگىڭدە بولسا بولعانى. قازىرگى ايەلدەردىڭ حيدجاب كيگەنى ۇلتقا قايشى نارسە. مەن ويلايمىن سۇننەت، ءۋاجىپ، پارىز دەگەنىڭ ءوزى شارتتى نارسە. ءبىر پارىز قاجىعا بارۋ، قاجىعا دا بارعان جوقپىن، ماقتانعانىم ەمەس شىندىق، ناماز وقىمايمىن، ورازا ۇستامايمىن. ۇيدەگى اجەمىز سوسىن بالالاردىڭ ءوزى ورازا ۇستاپ جاتادى.

مەنىڭ ورازام قاعاز بەتىندە بولادى. ەندى ءبىر اي ورازا ۇستاساڭ، ءبىر اي جازۋدان قالدىڭ دەگەن ءسوز. اش وتىرىپ جازا المايسىڭ عوي. مەن ءوزىمدى مۇسىلمان دەپ سانايمىن»، - دەگەن جازۋشى ءوزىنىڭ سوڭعى سۇحباتىندا.

جازۋشى ءارۋاققا سەنۋ مەن ولاردى قۇرمەتتەۋ يسلامعا قايشى ەمەس دەپ سانايدى.

«سونىمەن قاتار بۇرىنعى ءتاڭىردى دە تەرىسكە شىعارمايمىن. اتا-بابامىز سونىمەن كەلدى. ءارۋاققا سەنۋ - يسلامعا قايشى ەمەس. ءارۋاق جوق بولسا - قازاق تا جوق. ءارۋاق دەگەن - قازاقتىڭ رۋحى. ءدىن حالىقتىڭ ومىرىندەگى ەڭ ماڭىزدى ماسەلە ەمەس.

ءدىن اپيىن، از عانا بولسا ول پايدا، كوپ بولسا ول ناركوتيك. اسىرە دىنشىلدىكتى قازاق ەشقاشان قولداعان جوق. كەرەك دەسەڭىز ابايدان باستاپ سۇلتان ماحمۇتتاردىڭ كەزىندە دىنگە قارسىلىق بولدى، قازاق دىنگە بەرىلىپ كەتتى دەپ. ءدىن تۇنەك. ءدىن سوقىرلىق دەگەن ۇعىم بولدى. ارينە ءدىن كەرەك ءبىراق فاناتيك بولىپ كەتۋ دەگەن ەمەس، قازاقتى تەرىسكە شىعارۋ دەگەن ءسوز ەمەس»، - دەدى جازۋشى.