ابۋ-گرەيب تۇرمەسىنىڭ بۇرىنعى تۇتقىندارى 42 ميلليون دوللار الدى
استانا. KAZINFORM - ا ق ش باقىلاۋىنداعى يراكتاعى ابۋ-گرەيب تۇرمەسىنىڭ بۇرىنعى تۇتقىندارى امەريكالىق قورعانىس CACI Premier Technology كومپانياسىن 2000 -جىلداردىڭ باسىندا امەريكالىق اسكەريلەردىڭ تۇتقىندارعا زورلىق-زومبىلىق كورسەتكەنىنە كومەكتەسكەنى ءۇشىن 42 ميلليون دوللار تالاپ ەتتى، دەپ جازادى The Hill.
بۇرىنعى ءۇش تۇتقىننىڭ ءارقايسىسى دەنساۋلىعىنا كەلتىرىلگەن شىعىن ءۇشىن 3 ميلليون دوللار، مورالدىق شىعىن ءۇشىن 11 ميلليون دوللار وتەماقى الدى.
سۋحايل ءال-شيماري، سالاح ءال-ەدجايلي جانە اساد ءال-زۋباي العاش رەت 2008 -جىلى سوتقا شاعىم تۇسىرگەن، ءبىراق ءىس كەيىنگە شەگەرىلگەن. ءبىرىنشى سوت پروتسەسى اعىمداعى جىلدىڭ ءساۋىر ايىندا عانا ءوتتى. وندا سوت القاسى ءبىراۋىزدان شەشىمگە كەلە المادى.
2004 -جىلى ا ق ش اسكەريلەرىنىڭ ابۋ-گرەيب تۇرمەسىندەگى تۇتقىنداردى اياۋسىز ازاپتاعانى بەلگىلى بولدى. ول يراكتاعى ا ق ش باستاعان كواليتسياعا قارسى قىلمىس جاسادى دەپ ايىپتالعان ادامداردى قاماۋعا الدى.
ەڭ اۋىر زاڭ بۇزۋشىلىقتار 2003 -جىلدىڭ قازانى مەن جەلتوقسانى ارالىعىندا، ياعني ا ق ش تەرروريزمگە قارسى جاھاندىق سوعىستىڭ ءبىر بولىگى رەتىندە يراكقا العاش رەت باسىپ كىرگەننەن بىرنەشە اي وتكەن سوڭ ورىن الدى.
ا ق ش تەرروريستىك توپتارمەن، سونىڭ ىشىندە «ءال-كايدامەن» بايلانىسى بار كۇدىكتىلەردى ىزدەپ، جاۋاپ الۋعا تىرىسقاندا، ابۋ-گرەيب اسكەري پوليتسيا مەكەمەسى بولدى.
تەرگەۋ ناتيجەسىندە ا ق ش قارۋلى كۇشتەرىنىڭ باسشىلىعى اسكەريلەردىڭ كەيبىر ارەكەتتەرى جەنەۆا كونۆەنتسيالارىن بۇزعانىن مويىندادى. تۇتقىندارعا قيانات جاساعانى ءۇشىن 11 اسكەري قىزمەتكەر سوتقا جىبەرىلدى. ابۋ-گرەيبتەگى تەرگەۋشىلەردىڭ ادىستەرى تۋرالى جاريالانىمدار امەريكالىق ب ا ق-تا كەڭ رەزونانس تۋدىردى. ول كەزدە CACI Premier Technology كومپانياسى ابۋ-گرەيبتە دە جۇمىس ىستەگەن ازاماتتىق تەرگەۋشىلەردى جالدادى. CACI Premier Technology كومپانياسى ۆيردجينيا شتاتىنىڭ رەستون قالاسىندا ورنالاسقان.
باعدادتىڭ ورتالىق يزولياتورى دەپ تە اتالاتىن ابۋ-گرەيب 2014 -جىلى جابىلعان بولاتىن.
بۇعان دەيىن يراك ارنايى قىزمەتى يراكتاعى «يسلام مەملەكەتى» (ي م) توبىنىڭ (قازاقستاندا تىيىم سالىنعان ۇيىم - رەد. ەسكەرتپەسى) باسشىسىن، سونداي-اق تاعى سەگىز قولباسشىنى جويعانى حابارلانعان بولاتىن.
اۆتور
ەركەجان سماعۇلوۆا
