ماماندىق تاڭداۋ: تەگىن پلاتفورما قانداي مۇمكىندىك بەرەدى

ەڭبەك جانە حالىقتى الەۋمەتتىك قورعاۋ مينيسترلىگى قازاقستاندىقتارعا «مانساپ كومپاسى» سيفرلىق پلاتفورماسىنىڭ مۇمكىندىكتەرىن ەسكە سالادى. بۇل پلاتفورما وقۋشىلارعا، ولاردىڭ اتا-انالارىنا جانە ەرەسەك ازاماتتارعا كاسىپ تاڭداۋعا، ەڭبەك نارىعىندا سۇرانىسقا يە ماماندىقتاردى بىلۋگە جانە جۇمىسقا ورنالاسۋ مۇمكىندىكتەرىمەن تانىسۋعا كومەكتەسەدى.

2026-جىلعى 1-قازانداعى جاعداي بويىنشا پلاتفورمادا 7-11-سىنىپتاردا وقيتىن 34596 وقۋشى كاسىبي باعدارلاۋ تەستىنەن وتكەن. تەست ناتيجەسىندە ءار وقۋشىعا بولاشاقتا قاي باعىتتا جۇمىس ىستەۋگە بەيىمى بار ەكەنىن انىقتاۋعا كومەكتەسەتىن جەكە ۇسىنىستار بەرىلگەن.

تەستىلەۋگە ەڭ كوپ قاتىسقان ءوڭىر - قىزىلوردا وبلىسى. مۇندا 22602 وقۋشى تەست تاپسىرعان. شىعىس قازاقستان وبلىسىندا سەرۆيستى 3497 وقۋشى پايدالانسا، جامبىل وبلىسىندا – 2675، استانادا 2456 وقۋشى وتكەن.

ماماندىق تاڭداۋ - ادام ومىرىندەگى ماڭىزدى قادامداردىڭ ءبىرى. ويتكەنى ول بولاشاقتا قانداي ءبىلىم الاتىنىنا جانە كاسىبي تۇرعىدا قالاي داميتىنىنا اسەر ەتەدى. سوندىقتان ماماندىق تاڭداعاندا ادامنىڭ ءوز قىزىعۋشىلىعى مەن قابىلەتىن عانا ەمەس، سول سالاعا قويىلاتىن تالاپتاردى، ءبىلىم الۋ مۇمكىندىكتەرىن جانە ەڭبەك نارىعىنداعى جاعدايدى دا ەسكەرگەن ءجون.

«مانساپ كومپاسى» پلاتفورماسىندا كاسىپ تاڭداۋعا قاجەتتى بارلىق اقپارات ءبىر جەرگە جيناقتالعان. مۇندا ءتۇرلى ماماندىقتارمەن تانىسىپ، وقۋ باعىتتارىن سالىستىرۋعا جانە بولاشاق كاسىبىن سانالى تۇردە تاڭداۋعا بولادى.

پلاتفورمانىڭ نەگىزگى قۇرالدارىنىڭ ءبىرى - كاسىبي باعدارلاۋ تەستى. ول ادامنىڭ قانداي ماماندىقتارعا قىزىعاتىنىن جانە قاي سالاعا بەيىمى بار ەكەنىن انىقتاۋعا كومەكتەسەدى. تەست ناتيجەسى بويىنشا پايدالانۋشىعا وزىنە قولايلى باعىتتار ۇسىنىلادى. وسىلايشا، وقۋشىلار وزدەرىنىڭ مىقتى تۇستارىن جاقسىراق ءتۇسىنىپ، قابىلەتى مەن قىزىعۋشىلىعىنا ساي كەلەتىن ماماندىقتاردى انىقتايدى.

تەستىلەۋدەن بولەك، پلاتفورمادا ماماندىقتار، قاجەتتى داعدىلار جانە ءبىلىم الۋ مۇمكىندىكتەرى تۋرالى اقپارات بار. پايدالانۋشىلار سالاعا، وڭىرگە جانە جالاقى دەڭگەيىنە قاراي قاراستىرا الادى. سونداي-اق تاڭداعان ماماندىعىن قاي وقۋ ورنىندا مەڭگەرۋگە بولاتىنىن دا بىلەدى.

بۇل سەرۆيس اسىرەسە وقۋشىلار مەن اتا-انالار ءۇشىن پايدالى. ماماندىقتاردى بىرگە زەرتتەۋ ارقىلى بولاشاق ماماندىقتىڭ ءتۇرلى نۇسقالارىن تالقىلاۋعا، ءار ماماننىڭ نەمەن اينالىساتىنىن، قانداي ءبىلىم مەن داعدى قاجەت ەكەنىن جانە ونى قايدان الۋعا بولاتىنىن بىلۋگە بولادى.

ايتا كەتەيىك، كاسىبي باعدارلاۋ تەستىنىڭ ناتيجەلەرى ۇسىنىمدىق سيپاتقا يە. سوندىقتان كاسىپتى تۇپكىلىكتى تاڭداعاندا ادامنىڭ جەكە قىزىعۋشىلىعى مەن قابىلەتىن، ءبىلىم الۋ مۇمكىندىكتەرىن جانە قاجەتتى داعدىلاردى مەڭگەرۋگە دايىندىعىن ەسكەرۋ ماڭىزدى.

«مانساپ كومپاسى» ەرەسەك ازاماتتارعا دا قولجەتىمدى. ماسەلەن، قىزمەت سالاسىن وزگەرتكىسى كەلەتىن، جاڭا ماماندىق مەڭگەرۋدى نەمەسە كاسىبي دامۋىنىڭ كەلەسى باعىتىن انىقتاۋدى جوسپارلاعان ادامدار پلاتفورمانى پايدالانا الادى.

وسىلايشا، «مانساپ كومپاسى» ءتۇرلى ماماندىقتارمەن تانىسىپ قانا قويماي، ءبىلىم الۋ مەن مانساپ جولىن جوسپارلاۋعا قاجەتتى اقپارات الۋعا مۇمكىندىك بەرەدى.

سيفرلىق پلاتفورمانى mansap.enbek.kz سايتى ارقىلى تەگىن پايدالانۋعا بولادى.

قازاقستاندا قاي ماماندىق يەلەرى جۇمىسسىز قالمايتىنى تۋرالى جازعان ەدىك.