ادامنىڭ تابىستى بولۋىنا اتا-اناسىنىڭ بايلىعىنان گورى دوستارى كوبىرەك اسەر ەتەدى - زەرتتەۋ
استانا. KAZINFORM - ادامنىڭ قارجىلىق جاعدايىنا دوستارى مەن ارالاساتىن ورتاسى اتا-اناسىنىڭ بايلىعىنان دا قاتتى ىقپال ەتۋى مۇمكىن. ستەنفورد ۋنيۆەرسيتەتىنىڭ پروفەسسورى مەتتيۋ و. دجەكسون الەۋمەتتىك بايلانىستاردىڭ ەكونوميكالىق مۇمكىندىكتەرگە اسەرىن زەرتتەپ، كەدەيلىكتى ازايتۋ ءۇشىن قارجىلاي كومەكپەن قاتار ادامداردىڭ الەۋمەتتىك ورتاسىنا دا نازار اۋدارۋ قاجەت ەكەنىن ايتتى.
عالىمنىڭ پىكىرىنشە، ادامنىڭ كىمدەرمەن ارالاساتىنى ونىڭ جۇمىس تابۋىنا، كاسىبي دامۋىنا جانە تابىسىن ارتتىرۋىنا اسەر ەتەدى. دوستار جاڭا جۇمىس تۋرالى حابارلاپ، پايدالى بايلانىس ورناتۋعا كومەكتەسىپ، ءوز جەتىستىگى ارقىلى وزگەلەرگە ۇلگى بولا الادى. ال اينالاسىندا جاقسى تابىسقا جەتكەن، مانساپ قۇرعان ادامدار بولماسا، ادامنىڭ مۇمكىندىكتەرى تۋرالى تۇسىنىگى دە شەكتەۋلى بولۋى ىقتيمال.
دجەكسون الەۋمەتتىك موبيلدىلىككە كەدەرگى كەلتىرەتىن ەكى فاكتوردى اتاپ كورسەتەدى. ءبىرىنشىسى - ادامداردىڭ وزىنە ۇقساس الەۋمەتتىك ورتادان شىققاندارمەن كوبىرەك ارالاسۋعا بەيىمدىلىگى. ەكىنشىسى - ءارتۇرلى تابىس دەڭگەيىندەگى ادامدار اراسىنداعى ەكونوميكالىق بايلانىستاردىڭ السىزدىگى. مۇنداي جاعدايدا مۇمكىندىگى شەكتەۋلى ادامنىڭ جاقسى جۇمىسقا ورنالاسۋىنا كومەكتەسەتىن تانىستارى مەن بايلانىستارى از بولادى.
سوندىقتان الەۋمەتتىك تەڭسىزدىكتى ازايتۋ ءۇشىن تەك اقشالاي جاردەم بەرۋ جەتكىلىكسىز بولۋى مۇمكىن. ادامداردىڭ جاڭا ورتاعا ارالاسۋىنا، كاسىبي بايلانىس ورناتۋىنا جانە جۇمىس مۇمكىندىكتەرىنە قول جەتكىزۋىنە جاعداي جاساۋ دا ماڭىزدى.
پروفەسسور بۇل ماسەلەگە بارسەلونا اۆتونومدى ۋنيۆەرسيتەتىندە قۇرمەتتى دوكتور اتاعىن الۋ راسىمىندە نازار اۋدارعان. ونىڭ پايىمىنشا، الەۋمەتتىك ورتاداعى كەدەرگىلەردى ازايتۋ - ادامداردىڭ تابىسىن ارتتىرىپ، قوعامداعى الەۋمەتتىك موبيلدىلىكتى كۇشەيتۋدىڭ ماڭىزدى باعىتتارىنىڭ ءبىرى.
