اپاتتان قازا تاپقانداردىڭ وتباسىلارىنا قانداي كومەك كورسەتىلەدى
قاراعاندى وبلىسىنىڭ اكىمدىگى ۋاكىلەتتى مەملەكەتتىك ورگاندارمەن بىرلەسىپ، كوستەنكو اتىنداعى شاحتادا بولعان ءورت سالدارىنان قازا تاپقان «ارسەلورميتتال تەمىرتاۋ» ا ق جۇمىسشىلارىنىڭ وتباسى مۇشەلەرىنىڭ ءتىزىمىن جاساپ جاتىر.
مەملەكەت باسشىسىنىڭ تاپسىرماسى بويىنشا ولارعا تولىققاندى كومەك كورسەتىلەتىن بولادى. بۇل تۋرالى ۇكىمەتتىڭ باسپا ءسوز قىزمەتىنەن ءمالىم ەتتى، دەپ حابارلايدى kazinform.
ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا كوستەنكو اتىنداعى شاحتادا بولعان ءورت كەزىندە قازا تاپقانداردىڭ وتباسىلارىنا قانداي كومەك كورسەتىلەتىنىن ايتتى.
«مەملەكەت تاراپىنان قازاق تاپقان شاحتەرلەردىڭ وتباسىلارىنا اسىراۋشىسىنان ايىرىلعانى ءۇشىن تولەمدەر تولەنەدى. ءبىرىنشىسى - بازالىق جاردەماقى، ەكىنشىسى - الەۋمەتتىك ساقتاندىرۋ قورىنان، ءۇشىنشىسى - ءومىردى ساقتاندىرۋ كومپانياسىنان تولەنەدى. تولەمدەردىڭ ورتاشا مولشەرى 400 مىڭنان 500 مىڭعا دەيىن جەتەدى. جانە ول تولەمدەر اسىراۋىندا بولعان جاسوسپىرىمدەر، 18 جاسقا تولعانشا، ەگەر بالالار مەكتەپتەن كەيىنگى جوعارى ءبىلىم الىپ جاتسا - 23 جاسقا تولعانشا بەرىلەدى»، - دەدى مينيستر.
سونداي- اق «ارسەلورميتتال تەمىرتاۋدىڭ» ۇجىمدىق شارتىنا سايكەس، كومپانيا مىندەتتى تۇردە قازا تاپقان شاحتەردىڭ وتباسىنا 10 جىلدىق ەڭبەكاقىسىن تولەيدى.
وعان قوسا ق ر ۇكىمەتىنىڭ سايتى كوز جۇمعان جۇمىسشىلاردىڭ جانۇيالارىنا كورسەتىلەتىن قولداۋ شارالارىنىڭ تولىق ءتىزىمىن جاريالادى:
- كومپانيا قاراجاتى ەسەبىنەن وتباسىلارعا باسپانا ساتىپ الۋ؛
- مورالدىق زيان ءۇشىن 10 جىلدىق جالاقى مولشەرىندە ءبىرجولعى تولەم؛
- اسىراۋىندا بولعان بالالارعا 18 جاسقا تولعانعا دەيىن اي سايىنعى ساقتاندىرۋ تولەمى (ج و و ستۋدەنتى بولسا، 23 جاسقا دەيىن)؛
- مەملەكەتتىك الەۋمەتتىك ساقتاندىرۋ قورىنان جالاقىسىنا بايلانىستى اي سايىنعى تولەم؛
- قامقورلىقتاعى ادامداردىڭ سانىنا بايلانىستى اسىراۋشىسىنان ايىرىلۋ جاعدايى بويىنشا اي سايىنعى مەملەكەتتىك جاردەماقى؛
- جۇمىس بەرۋشىنىڭ قاراجاتى ەسەبىنەن وتباسىلاردىڭ نەسيەلەرىن وتەۋ؛
- جەرلەۋگە بايلانىستى بارلىق شىعىنداردى وتەۋ؛
- قازا تاپقانداردىڭ بالالارى مەن جۇبايلارىن جۇمىسقا ورنالاستىرۋ؛
- 23 جاسقا دەيىنگى بالالاردىڭ وقۋ اقىسىن تولەۋ؛
- قازا تاپقانداردىڭ جۇبايلارى مەن بالالارىنا ساناتوري- كۋرورتتىق ەمدەلۋگە جولدامالار بەرۋ؛
- ءۇيدى پەشپەن جىلىتاتىن وتباسىلارعا جىل سايىن كومىر ءبولۋ.
مەملەكەت باسشىسىنىڭ تاپسىرماسىنا سايكەس «ارسەلورميتتال تەمىرتاۋ» ا ق- نىڭ قازا تاپقان قىزمەتكەرلەرىنىڭ وتباسىلارىنا بارلىق قاجەتتى كومەك كورسەتۋ ماسەلەلەرى ق ر ۇكىمەتىنىڭ ەرەكشە باقىلاۋىندا.
ەسكە سالايىق، بۇگىن تۇندە قاراعاندى وبلىسىنداعى كوستەنكو اتىنداعى شاحتادا ءورت بولدى. ساعات 17.33 تەگى مالىمەت بويىنشا 33 كەنشىنىڭ دەنەسى تابىلدى,13 ادام ىزدەستىرىلىپ جاتىر.
كەشقۇرىم بريفينگ وتكىزگەن توتەنشە جاعدايلار ءمينيسترى سىرىم ءشارىپحانوۆ جەر استىندا قالعان كەنشىلەردى ءتىرى تابۋعا ءۇمىت وتە از ەكەنىن ءمالىم ەتتى.
كاسىبي اسكەريلەندىرىلگەن اپاتتىق- قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالى ديرەكتورىنىڭ ورىنباسارى جۇمات وكەنوۆ مەرت بولعان كەنشىلەردىڭ جەكە باسىن انىقتاۋ قيىنعا ءتۇسىپ جاتقانىن ايتتى.
29-قازان جالپىۇلتتىق ازا تۇتۋ كۇنى بولىپ جاريالاندى.
مەملەكەت باسشىسى قاسىم- جومارت توقايەۆ ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ تۋرالى تاپسىرما بەردى. كەيىن ۇكىمەتتىڭ باسپا ءسوز قىزمەتى «ارسەلورميتتال تەمىرتاۋ» ا ق- نىڭ مەنشىك قۇقىعىن ق ر مەنشىگىنە قايتارۋ تۋرالى كەلىسىمشارتتىڭ اياقتالۋعا جاقىن ەكەنىن ءمالىم ەتتى.
