اپات بولعان ايماقتاردا جاڭارۋ جانە جاڭعىرۋ جۇمىستارى باستالادى - پرەزيدەنت

استانا. KAZINFORM - اپاتتىڭ سالدارىن جويۋ - جۇمىستىڭ ءبىر كەزەڭى عانا. ەڭ باستىسى، اپات بولعان ايماقتاردا جاڭارۋ جانە جاڭعىرۋ جۇمىستارى باستالادى. بۇل - وتە ماڭىزدى شارۋا. سوندىقتان الدىمىزدا اۋقىمدى جۇمىس تۇر.

بۇل تۋرالى مەملەكەت باسشىسى قاسىم-جومارت توقايەۆ اقوردادا ءوتىپ جاتقان عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ايتتى.

«وزدەرىڭىزگە ءمالىم، سوڭعى جىلدارى ەلىمىز كوپتەگەن سىن-قاتەردى باستان وتكەرىپ جاتىر. مەملەكەتتىك اپپارات قيىندىقتارمەن كۇرەسىپ، مول تاجىريبە جيناقتادى. شىڭدالا ءتۇستى. قازىرگى مەملەكەتتىك قىزمەتشىلەردىڭ ومىرلىك ساباعى توقسانىنشى جىلدارداعى تاجىريبەدەن ارتىق بولماسا، كەم ەمەس. مەن سۋ تاسقىنىمەن كۇرەسىپ جاتقان مەملەكەتتىك قىزمەتشىلەرگە، قۇتقارۋشىلارعا جانە ەرىكتىلەرگە العىسىمدى ايتامىن. سونداي-اق كۇردەلى جاعدايدا مىزعىماس بىرلىكتە بولىپ، ءوزارا جاناشىرلىق كورسەتكەن، سابىر مەن توزىمدىلىك تانىتقان بارشا حالقىمىزعا زور ريزاشىلىعىمدى بىلدىرەمىن. ءبىز بۇل قيىندىقتى مىندەتتى تۇردە ەڭسەرەمىز. مەملەكەت تاراپىنان بارلىق شارۋا تياناقتى جاسالادى. ءار قيىندىقتىڭ قايىرى بار»، - دەپ قورىتتى پرەزيدەنت.