اۋا رايىن ەلەمەگەن كولىك جۇرگىزۋشىلەرى ايىپپۇل ارقالاي باستادى
استانا. KAZINFORM - بوران، داۋىلعا قاراماستان جولعا شىعاتىن اۆتوكولىك جۇرگىزۋشىلەرى اكىمشىلىك جاۋاپقا تارتىلىپ جاتىر. بۇل تۋرالى توتەنشە جاعدايلار مينيسترلىگى توتەنشە جاعدايلاردى جويۋ دەپارتامەنتى باستىعىنىڭ ورىنباسارى جومارت اسقاروۆ ءمالىم ەتتى.
«اۋا رايىنىڭ قولايسىزدىعىنا قاتىستى حابارلامالاردى ەسكەرمەي جولعا شىققان اۆتوكولىك جۇرگىزۋشىلەرى اكىمشىلىك جاۋاپقا تارتىلادى. ونى پوليتسيا قىزمەتكەرلەرى اتقارادى. الدىمەن جۇرگىزۋشىگە ەسكەرتۋ جاسالادى، ەگەر قايتالانسا ايىپپۇل سالىنادى»، - دەدى توتەنشە جاعدايلار مينيسترلىگى توتەنشە جاعدايلاردى جويۋ دەپارتامەنتى باستىعىنىڭ ورىنباسارى جومارت اسقاروۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق سپيكەر ب ا ق وكىلدەرىنىڭ «ايىپپۇل قانشا كولەمدە سالىنادى جانە وسى كۇنگە دەيىن قانشا اۆتوكولىك جۇرگىزۋشىسى اكىمشىلىك جاۋاپقا تارتىلدى» دەگەن ساۋالعا سول جەردە جاۋاپ بەرە المادى.
«ايىپپۇل كولەمى مەن سانى تۋرالى اقپاراتتى سىزدەرگە جازباشا جىبەرەيىن»، - دەدى ت ج م وكىلى.
