ادام قايتىس بولعان جاعدايدا ونىڭ زەينەتاقى جيناعى كىمگە قالادى

Kazinform ءتىلشىسى وسى سۇراقتارعا جاۋاپ ىزدەدى.

جەرلەۋگە قانشا اقشا بەرىلەدى؟

قايتىس بولعان ادامنىڭ ءبىرىڭعاي جيناقتاۋشى زەينەتاقى قورىندا (ب ج ز ق) جيناعى بولسا، ونىڭ وتباسى مۇشەلەرى جەرلەۋگە ارنالعان ءبىرجولعى تولەم الا الادى.

2026-جىلى بۇل تولەمنىڭ ەڭ جوعارى مولشەرى - 406550 تەڭگە نەمەسە 94 ايلىق ەسەپتىك كورسەتكىش (ا ە ك). بيىل ءبىر ا ە ك 4325 تەڭگەنى قۇرايدى.

ءبىراق بۇل اقشا قايتىس بولعان ادامنىڭ ءوز جيناعىنان تولەنەدى. سوندىقتان تولەم ونىڭ شوتىنداعى قاراجاتتان اسپايدى.

مىسالى، شوتتا 300 مىڭ تەڭگە بولسا، وتباسى جەرلەۋگە وسى سومادان ارتىق الا المايدى. ال جيناعى 406550 تەڭگەدەن كوپ بولسا، الدىمەن بەلگىلەنگەن مولشەردە تولەم بەرىلەدى.

زاڭ بويىنشا شوتتا قالعان اقشانى دا الۋعا بولادى. ەگەر جەرلەۋ تولەمىنەن كەيىنگى قالدىق ەڭ تومەنگى زەينەتاقى مولشەرىنەن اسپاسا، ول دا وتباسى مۇشەلەرىنە بەرىلەدى. 2026-جىلى ەڭ تومەنگى زەينەتاقى - 69049 تەڭگە.

ماسەلەن، قايتىس بولعان ادامنىڭ شوتىندا 450 مىڭ تەڭگە بار دەلىك. ونىڭ 406550 تەڭگەسى جەرلەۋگە تولەنەدى. قالعان 43450 تەڭگەنى دە وتباسى الا الادى. ويتكەنى بۇل سوما ەڭ تومەنگى زەينەتاقى مولشەرىنەن از.

جەرلەۋگە ارنالعان تولەمدى قالاي الۋعا بولادى؟

تولەم الۋ ءۇشىن ب ج ز ق بولىمشەسىنە بارۋعا نەمەسە قوردىڭ سايتى ارقىلى ونلاين ءوتىنىش بەرۋگە بولادى.

بولىمشەگە بارعان كەزدە جەكە كۋالىك پەن بانك شوتىنىڭ دەرەكتەمەلەرى قاجەت.

ەگەر مەملەكەتتىك دەرەكتەر بازاسىندا ادامنىڭ قايتىس بولعانى نەمەسە تۋىستىق بايلانىسى تۋرالى مالىمەت بولماسا، قايتىس بولۋ تۋرالى كۋالىك پەن تۋىستىقتى راستايتىن قۇجات قوسىمشا سۇرالادى.

ونلاين ءوتىنىش بەرۋ ءۇشىن ەلەكتروندىق سيفرلىق قولتاڭبا (ە ت س ق) قاجەت. سونداي-اق ادامنىڭ قايتىس بولعانى مەن تۋىستىق بايلانىسى تۋرالى مالىمەتتەر مەملەكەتتىك دەرەكتەر بازاسىندا بولۋى ءتيىس.

ەگەر تولەم 14 جاسقا تولماعان بالاعا تيەسىلى بولسا، ونىڭ اتىنان زاڭدى وكىلى ءوتىنىش بەرەدى. ال 14 پەن 18 جاس ارالىعىنداعى جاس وسپىرىمدەر اتا-اناسىنىڭ نەمەسە باسقا زاڭدى وكىلىنىڭ جازباشا كەلىسىمىمەن وزدەرى ءوتىنىش بەرە الادى.

بۇل جاعدايدا بالانىڭ قۇجاتتارى مەن ءوز اتىنا اشىلعان بانك شوتىنىڭ دەرەكتەمەلەرى قاجەت.

قالعان زەينەتاقى جيناعى كىمگە بەرىلەدى؟

جەرلەۋگە ارنالعان تولەمنەن كەيىن شوتتا اقشا قالسا، ول زاڭ بويىنشا مۇراگەرلەرىنە بەرىلەدى.

مۇراگەرلەر مىندەتتى، مىندەتتى كاسىپتىك جانە ەرىكتى زەينەتاقى جارنالارى ەسەبىنەن جينالعان قاراجاتتى الا الادى.

ول ءۇشىن ب ج ز ق- عا جەكە كۋالىك، مۇراعا قۇقىق تۋرالى كۋالىك نەمەسە قاراجاتقا قۇقىعىن راستايتىن زاڭدا كوزدەلگەن باسقا قۇجات جانە بانك شوتىنىڭ دەرەكتەمەلەرى قاجەت.

ەگەر مەملەكەتتىك دەرەكتەر بازاسىندا ادامنىڭ قايتىس بولعانى تۋرالى مالىمەت بولماسا، قايتىس بولۋ تۋرالى كۋالىك تە سۇرالادى.

مۇراگەر قۇجاتتاردى قور بولىمشەسىنە ءوزى تاپسىرا الادى. سونداي-اق سەنىمحات ارقىلى وكىلىن جىبەرۋگە نەمەسە پوشتا ارقىلى جولداۋعا بولادى. سوڭعى ەكى جاعدايدا قوسىمشا، ونىڭ ىشىندە نوتاريۋس كۋالاندىرعان قۇجاتتار قاجەت بولۋى مۇمكىن.

ماڭىزدىسى - مۇراعا قالعان اقشا تەك مۇراگەردىڭ ءوز بانك شوتىنا اۋدارىلادى. ونى تۋىسىنىڭ، قامقورشىسىنىڭ نەمەسە سەنىم بىلدىرىلگەن ادامنىڭ شوتىنا اۋدارۋعا بولمايدى.

قاجەتتى قۇجاتتار مەن تولەمدى راسىمدەۋ ءتارتىبى تۋرالى تولىق اقپارات ب ج ز ق- نىڭ رەسمي سايتىندا بەرىلگەن.

بالالار زەينەتاقى جيناعىن مۇراعا الا الا ما؟

ءيا، كامەلەتكە تولماعان بالالار دا زەينەتاقى جيناعىن مۇراعا الا الادى.

14 جاسقا تولماعان بالانىڭ اتىنان قۇجاتتاردى اتا-اناسى، اسىراپ الۋشىسى نەمەسە قامقورشىسى تاپسىرادى.

ال 14 پەن 18 جاس ارالىعىنداعى جاس وسپىرىمدەر زاڭدى وكىلىنىڭ كەلىسىمىمەن وزدەرى ءوتىنىش بەرە الادى.

مۇرانى راسىمدەۋ ءۇشىن بالانىڭ تۋۋ تۋرالى كۋالىگى، مۇراعا قۇقىقتى راستايتىن قۇجات جانە بانك شوتىنىڭ دەرەكتەمەلەرى قاجەت.

جاسىنا جانە جاعدايىنا قاراي بالانىڭ جەكە كۋالىگى، اتا-اناسىنىڭ جازباشا كەلىسىمى نەمەسە قامقورشىلىقتى راستايتىن قۇجاتتار دا سۇرالۋى مۇمكىن.

مۇراعا قالعان اقشا اتا-اناسىنىڭ ەمەس، بالانىڭ ءوز اتىنا اشىلعان بانك شوتىنا تۇسەدى.

مۇراعا قالعان اقشادان سالىق ۇستالا ما؟

2026-جىلعى 1-قاڭتاردان باستاپ قازاقستان رەزيدەنتتەرىنە ب ج ز ق- دان بەرىلەتىن زەينەتاقى تولەمدەرىنەن جەكە تابىس سالىعى ۇستالمايدى.

ال قازاقستاننىڭ رەزيدەنتى ەمەس ادامدارعا تولەنەتىن قاراجاتقا سالىق كودەكسىنە سايكەس سالىق سالىنادى.

بۇعان دەيىن قازاقستاندا زەينەتاقى اننۋيتەتى بويىنشا تولەمدەر 81,5 ميلليارد تەڭگەگە جەتكەنى تۋرالى جازدىق.