ا ە س-تى فرانسۋز كومپانياسى سالۋى مۇمكىن بە - الماسادام ساتقاليەۆ جاۋاپ بەردى

 ەنەرگەتيكا ءمينيسترى الماسادام ساتقاليەۆ اقوردادا ب ا ق وكىلدەرىنە بەرگەن سۇحباتىندا فرانسيالىق Electricite de France كومپانياسىمەن قازاقستاندا ا ە س سالۋ ماسەلەسى بويىنشا كەلىسسوز جۇرگىزۋگە دايىن ەكەنىن ءمالىم ەتتى، دەپ حابارلايدى Kazinform اگەنتتىگى. 

«فرانسيا دەلەگاتسياسىنىڭ ساپارىنا كەلسەك، ەنەرگەتيكا مينيسترلىگى بويىنشا ءبىرشاما اۋقىمدى ماسەلەنى تالقىلاۋ كوزدەلگەن. ءبىرىنشى ماسەلە - Total Energy كومپانياسىمەن قۋاتى 1 گ ۆت بولاتىن جەل پاركىن سالۋ تۋرالى كەلىسىم. ول پاركتىڭ ەلەكتر قۋاتىن ساقتايتىن قۇرىلعىسى دا بولادى. بۇعان دەيىن جاھاندىق جىلىنۋعا قارسى كۇرەس، اتالعان جوباعا ينۆەستيتسيا تارتۋ جونىندە ۇكىمەتارالىق كەلىسىمگە قول قويىلعان بولاتىن. جالپى ماجىلىستە وسى كەلىسىمدى راتيفيكاتسيالاۋ جۇمىسىن باستاپ كەتتىك»، - دەدى ول فرانسيا جانە قازاقستان پرەزيدەنتتەرىنىڭ اقورداداعى كەزدەسۋى الدىندا.

سونداي-اق، ول فرانسيالىق كومپانيانىڭ قازاقستاندا ا ە س سالۋ مۇمكىندىگىنە توقتالدى.

«وسى ساپار اياسىندا ءبىزدىڭ EDF (Electricite de France - رەد. ) كومپانياسىمەن سەرىكتەستىگىمىز تالقىلانادى. قازىر ولار General Electric-تىڭ اتوم ەلەكتر ستانسالارىنا ارنالعان تۋربينالار وندىرىسىنە بايلانىستى اكتيۆتەرىن ساتىپ الۋ كەلىسىمىن اياقتاپ جاتىر. كومپانيانىڭ بۇل سالادا بىرەگەي تاجىريبەسى بار. فرانسيادا ولار 50 دەن استام رەاكتوردى ىسكە قوسقان. شەتەلدە دە سالادى. وزدەرىڭىز بىلەتىندەي، EDF قازاقستاندا ا ە س سالۋى مۇمكىن كومپانيالاردىڭ شورت- پاراعىنا ەنگەن. ەگەر فرانسيا تاراپى كەلىسسوز جونىندە باستاما بىلدىرسە، ءبىز ونى جۇرگىزۋگە دايىنبىز»، - دەدى الماسادام ساتقاليەۆ.

ەسكە سالايىق، فرانسيا پرەزيدەنتى قازاقستانعا مەملەكەت باسشىسى قاسىم-جومارت توقايەۆتىڭ شاقىرۋىمەن كەلدى.

ساپار اياسىندا ەكى ەل باسشىلارى ساۋدا- ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ، سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلايدى دەپ جوسپارلانعان.

ايتا كەتۋ كەرەك، قازاقستان پرەزيدەنتى قاسىم-جومارت توقايەۆتىڭ فرانسياعا بىلتىر جاساعان رەسمي ساپارى اياسىندا 35 قۇجاتقا قول قويىلعان بولاتىن.