ا ق ش يراننىڭ يادرولىق باعدارلاماسى تۋرالى اقپارات ءۇشىن 20 ميلليون دوللار ۇسىندى
استانا. KAZINFORM – ا ق ش مەملەكەتتىك دەپارتامەنتى يراننىڭ يادرولىق باعدارلاماسى تۋرالى اقپارات بەرگەندەرگە 20 ميلليون دوللارعا دەيىن سىياقى جاريالادى.
ۆاشينگتون يادرولىق نىساندار، جابدىقتار مەن ماماندار تۋرالى، سونداي-اق امەريكالىق سوققىلاردان كەيىن ولاردىڭ قايدا ورنالاسقانى جونىندە مالىمەت الۋعا ۇمىتتەنىپ وتىر، دەپ حابارلايدى BILD باسىلىمى.
ا ق ش تاراپى اسىرەسە يادرولىق باعدارلاماعا قاتىسى بار عالىمدار مەن باسقا دا قىزمەتكەرلەر، سونداي-اق جابدىقتاردىڭ ورىن اۋىستىرۋى تۋرالى اقپاراتقا قىزىعۋشىلىق تانىتىپ وتىر. مالىمەتتەردى Signal شيفرلانعان مەسسەندجەرى نەمەسە ا ق ش مەملەكەتتىك دەپارتامەنتىنىڭ ارنايى ءانونيمدى ونلاين ارناسى ارقىلى جىبەرۋگە بولادى.
اقشالاي سىياقىمەن قاتار، قاجەت بولعان جاعدايدا اقپارات بەرۋشىلەرگە باسقا ەلگە قونىس اۋدارۋعا كومەكتەسۋگە ۋادە ەتىلەدى. بۇل ۇسىنىس ا ق ش-تىڭ «ادىلدىك ءۇشىن سىياقى» (Rewards for Justice) باعدارلاماسى اياسىندا جۇزەگە اسىرىلادى.
ا ق ش مەملەكەتتىك دەپارتامەنتى بۇل باستامانى ۆاشينگتوننىڭ يراننىڭ يادرولىق باعدارلاماسىنىڭ قازىرگى جاعدايى تۋرالى جەتكىلىكتى ءارى سەنىمدى اقپاراتقا يە ەمەستىگىمەن تۇسىندىرەدى. ماگاتە ينسپەكتورلارىنىڭ جۇمىسىنا قويىلعان شەكتەۋلەرگە بايلانىستى حالىقارالىق اگەنتتىك تەگەراننىڭ قىزمەتىن، سونىڭ ىشىندە ۋران بايىتۋعا ارنالعان جابدىقتاردىڭ ءوندىرىسى مەن قورىن تولىق باقىلاي الماي وتىر.
ا ق ش ۆەدومستۆوسىنىڭ مالىمەتىنشە، يران ۋراندى 60 پايىزعا دەيىن بايىتقان. ال قارۋ جاساۋعا جارامدى ۋران الۋ ءۇشىن ونى ادەتتە شامامەن 90 پايىزعا دەيىن بايىتۋ قاجەت. ساراپشىلاردىڭ بولجامىنشا، ەلدەگى قولدا بار قوردى ودان ءارى بايىتقان جاعدايدا بىرنەشە يادرولىق وقتۇمسىق جاساۋعا جەتۋى مۇمكىن.
ايتا كەتەيىك، بۇعان دەيىن ماگاتە يراننان قارۋ جاساۋ دەڭگەيىنە جاقىن بايىتىلعان ۋران قورى تۋرالى ناقتى مالىمەت بەرۋدى تالاپ ەتكەن ەدى. ول كەزدە اگەنتتىك ينسپەكتورلارى بەس ايدان استام ۋاقىت بويى بۇل قوردى تەكسەرە الماعان.
ال يراننىڭ سىرتقى ىستەر ءمينيسترى ابباس اراكچي ۋران قورىنىڭ باسىم بولىگى اۋە سوققىلارى سالدارىنان قيراعان يادرولىق نىسانداردىڭ استىندا قالعانىن مالىمدەگەن ەدى.
