ا ق ش يەمەندىك حۋسيتتەردى قايتادان «تەررورلىق ۇيىم» دەپ تانىدى
استانا. KAZINFORM - مۇنداي شەشىم ا ق ش پرەزيدەنتى دونالد ترامپتىڭ جىل باسىنداعى وسىنداي قادامعا شاقىرۋىنان كەيىن قابىلداندى، دەپ حابارلايدى kazinform ءتىلشىسى.
ا ق ش- تىڭ مەملەكەتتىك دەپارتامەنتى سەيسەنبى كۇنى يەمەندىك حۋسيتتەر قوزعالىسىن «شەتەلدىك لاڭكەستىك ۇيىم» دەپ اتايتىنىن مالىمدەدى.
- حۋسيتتەر قوزعالىسىنىڭ قىزمەتى تاياۋ شىعىستاعى امەريكالىق بەيبىت تۇرعىندار مەن قىزمەتكەرلەردىڭ، ەڭ جاقىن ايماقتىق سەرىكتەستەرىمىزدىڭ قاۋىپسىزدىگىنە جانە جاھاندىق تەڭىز ساۋداسىنىڭ تۇراقتىلىعىنا قاۋىپ توندىرەدى، - دەدى مەملەكەتتىك حاتشى ماركو رۋبيو.
- ا ق ش حالىقارالىق بيزنەس جۇرگىزەمىز دەگەن جەلەۋمەن حۋسيتتەر سياقتى تەرروريستىك ۇيىمدارمەن ىنتىماقتاساتىن ەشبىر ەلگە جول بەرمەيدى، - دەپ قوستى ول.
مەملەكەتتىك دەپارتامەنت وكىلى بۇل وپەراتسيا اياسىندا جاسالعان ءىس-شارالار حۋسيتتەر مارتەبەسىن قايتا تاعايىنداۋ تۋرالى قاڭتارداعى شەشىمدى جۇزەگە اسىرۋ ەكەنىن ايتتى.
ا ق ش- تىڭ بۇرىنعى پرەزيدەنتى دجو بايدەن 2021-جىلى پرەزيدەنتتىك مەرزىمىنىڭ باسىندا حۋسيتتەردەن بۇرىنعى ترامپ اكىمشىلىگى تەرروريستىك ۇيىم دەپ تانىعان سانكسيالاردى الىپ تاستادى. مۇنداي قادام يەمەندەگى گۋمانيتارلىق ماسەلەلەردى شەشۋگە باعىتتالعان.
2025-جىلدىڭ قاڭتارىندا ا ق ش پرەزيدەنتى دونالد ترامپ حۋسيتتەردى شەتەلدىك تەرروريستىك ۇيىم رەتىندە قايتا تانۋ تۋرالى جارلىققا قول قويدى. ەندى ا ق ش مەملەكەتتىك دەپارتامەنتى بۇل شەشىمدى رەسمي تۇردە «انسار اللانى» شەتەلدىك تەرروريستىك ۇيىمداردىڭ تىزىمىنە ەنگىزدى.
وسىعان دەيىڭن دونالد ترامپتىڭ «انسار اللاح» (يەمەننىڭ كوپ بولىگىن باقىلايتىن حۋسيتتەر) توبىن تەرروريستىك ۇيىم رەتىندە قايتا تانۋ پروتسەسىن باستاۋ تۋرالى جارلىققا قول قويعانى تۋرالى جازدىق.
