ا ق ش يەمەن استاناسىنا اۋەدەن سوققى جاسادى
استانا. KAZINFORM - ا ق ش يەمەن استاناسى سانادا «انسار اللاح» كوتەرىلىسشىلەر قوزعالىسىنىڭ اسكەري نىساندارىنا سوققى جاسادى. بۇل تۋرالى Kazinform تاسس اگەنتتىگىنە سىلتەمە جاساپ حابارلايدى.
- ا ق ش اۋە كۇشتەرىنىڭ ورتالىق قولباسشىلىعى سانا ايماعىندا يران قولداۋ كورسەتەتىن حۋسيتتەردىڭ باقىلاۋىندا بولعان باسقارۋ- ديسپەتچەرلىك پۋنكتتەرى مەن زىمىراندار قويماسىنا اۋەدەن ءدال سوققىلار جاسادى، - دەپ حابارلادى اسكەري ۆەدومستۆو X الەۋمەتتىك جەلىسىندە.
مالىمدەمەدە سوققى جاسالعان عيماراتتار حۋسيتتەردىڭ ا ق ش-تىڭ اسكەري تەڭىز كۇشتەرىنە جانە قىزىل تەڭىزدەگى ساۋدا كەمەلەرىنە شابۋىلىن ۇيلەستىرەتىن باستى ورتالىعى بولعانى ناقتىلانادى.
سونداي-اق، ورتالىق قولباسشىلىق قىزىل تەڭىز ۇستىندە بىرنەشە ۇشقىشسىز ۇشاتىن اپپاراتتى جانە كەمەلەرگە قارسى قولدانىلاتىن قاناتتى زىمىراندى قاعىپ تۇسىرگەن.
گازا سەكتورىنداعى جاعداي ۋشىققان ساتتە «انسار اللاح» قوزعالىسى پالەستينا انكلاۆىنداعى احۋال تۇراقتانعانعا دەيىن يزرايل تەرريتورياسىن اتقىلايتىنىن، بۇل ەلگە قاتىستى كەز كەلگەن كەمەنىڭ قىزىل تەڭىزبەن جانە باب- ەل- ماندەب تۇبەگى ماڭىمەن جۇرۋىنە جول بەرمەيتىنىن مالىمدەگەن بولاتىن.
2023 -جىلدان بەرى حۋسيتتەر قىزىل تەڭىزدە جانە ادەن شىعاناعىندا ونداعان ازاماتتىق كەمەگە شابۋىل جاسادى.
ولاردىڭ بۇل ارەكەتىنە جاۋاپ رەتىندە ا ق ش بيلىگى قىزىل تەڭىزدەگى قوزعالىستىڭ قاۋىپسىزدىگىن قامتاماسىز ەتۋ جانە كەمەلەر قاتىناسىن جولعا قويۋ ماقساتىندا حالىقارالىق كواليتسيا قۇرىپ، Prosperity Guardian (گۇلدەنۋدى قورعاۋ) وپەراتسياسىن باستاپ كەتتى.
وسىلايشا ا ق ش پەن ۇلى بريتانيا قارۋلى كۇشتەرى يەمەندەگى بۇلىكشىلەردىڭ اسكەري نىساندارىنا دۇركىن-دۇركىن سوققى جاساپ جاتىر.
اقپاراتتى Kazinform-عا ارنايى تاسس ارىپتەس اگەنتتىگى ۇسىندى.
اۆتور
ەربول جانات
