ا ق ش-تىڭ ەڭ ىقپالدى تۇلعالارىنىڭ ءتىزىمى جاريالاندى
استانا. قازاقپارات - Vanity Fair جۋرنالى ا ق ش-تىڭ «جاڭا ەليتاسىنىڭ» ءتىزىمىن جاسادى، ونىڭ باسىندا OpenAI كومپانياسىنىڭ باس ديرەكتورى سەم التمان تۇر، ول SpaceX كومپانياسىنىڭ باس ديرەكتورى يلون ماسكتى، ۆيتسە- پرەزيدەنت دج. د. ءۆەنستى جانە مەملەكەتتىك حاتشى ماركو رۋبيونى باسىپ وزعان، دەپ حابارلايدى Kazinform اگەنتتىگىنىڭ ۆاشينگتونداعى مەنشىكتى ءتىلشىسى Vanity Fair باسىمىلىنا سىلتەمە جاساپ.
قازىر امەريكاداعى ەڭ ىقپالدى تۇلعا - الەمدى وزگەرتە الاتىن جانداردىڭ ءبىرى، OpenAI كومپانياسىنىڭ باس ديرەكتورى سەم التمان. 37 جاسىندا ول جاساندى ينتەللەكت ريەۆوليۋتسياسىنىڭ سيمۆولىنا اينالعان ChatGPT نى ىسكە قوستى، ال OpenAI دامىپ كەلە جاتقان سالادان ويىپ تۇرىپ ورىن الادى. باسىلىمنىڭ جازۋىنشا، كەلەشەك ۇرپاق التماندى كەزىندە بولاشاقتى وزگەرتكەن تۇلعا روبەرت وپپەنگەيمەرمەن سالىستىرۋى مۇمكىن.
Anthropic كومپانياسىنىڭ باس ديرەكتورى داريو امودەي ەكىنشى ورىندا. ول شىعاراتىن Anthropic ونىمدەرىنىڭ، اسىرەسە Claude Code باعدارلاماسىنىڭ تانىمال بولعانى سونشالىق، ءتىپتى ۇكىمەتپەن داۋلاسقانىنا قاراماستان كومپانيانىڭ پوزيتسياسى نىعىزدالا تۇسكەن. ينۆەستورلار امودەيدىڭ قۇبىلمالى كەزەڭدە ارەكەت ەتۋگە دايىندىعىن جانە جاساندى ينتەللەكتتى ىزگىلىك جولىندا پايدالانۋعا دەگەن ۇمتىلىسىن اتاپ وتەدى.
Tesla جانە SpaceX كومپانيالارىنىڭ باس ديرەكتورى يلون ماسك ۇزدىك ۇشتىكتى تۇيىندەدى.
ول الەۋمەتتىك جەلىنى، جاساندى ينتەللەكت بيزنەسىن جانە زىمىران-عارىش كومپانياسىن بىرىكتىرىپ، «بالامالى كاپيتاليزم» دەپ اتالاتىن مودەل جاسادى. ءداستۇرلى قارجىلىق كورسەتكىشتەرىنىڭ تۇراقسىزدىعىنا قاراماستان، ونىڭ ىقپالى، كاپيتالعا قول جەتكىزۋ مۇمكىندىگى جانە تانىمالدىعى ماماندار مەن ينۆەستورلاردى تارتۋعا كومەكتەسەدى. ماسكتىڭ باستى ارتىقشىلىعى، ول باتىل يدەيالاردى ومىرشەڭ جوبالارعا اينالدىرا الادى. قايتا پايدالانۋعا بولاتىن زىمىراندار مەن ەلەكتر كولىكتەرى قازىردىڭ وزىندە ايتارلىقتاي پايدا اكەلۋدە، ال ونىڭ بەدەلى تالانتتى قىزمەتكەرلەردى تارتۋعا كومەكتەسەدى.
2010 -جىلداردىڭ باسىندا Nvidia كومپانياسىنىڭ باس ديرەكتورى دجەنسەن حۋان تاۋەكەلگە بەل بۋىپ، جاساندى ينتەللەكت ءۇشىن قاجەت گرافيكالىق پروتسەسسورلاردى دامىتۋعا كۇش سالدى. ۋاقىت وتە، ونىڭ ءۇمىتى اقتالىپ، تابىسقا كەنەلدى. Nvidia جاساندى ينتەللەكت چيپتەرى نارىعىنىڭ ايتارلىقتاي ۇلەسىن جاۋلاپ الدى جانە جاساندى ينتەللەكتتىڭ دامۋىنان پايدا كورىپ وتىرعان باستى تۇلعالاردىڭ بىرىنە اينالدى.
ۇزدىك بەستىكتەن فەدەرالدى رەزەرۆ ءتوراعاسى كيەۆين ۋورش تا ورىن الدى. ونىڭ قابىلدايتىن شەشىمدەرى دوللاردىڭ قۇنىنا جانە ا ق ش-تىڭ ەكونوميكالىق ساياساتىنا، سونىڭ ىشىندە ينفلياتسيا مەن رەتسەسسياعا قارسى كۇرەسكە تىكەلەي اسەر ەتەدى. ۋورشتىڭ امەريكان قارجى جانە ساياسي ەليتاسىمەن بايلانىسى بار، ونىڭ تازا بايلىعى 135 ميلليون دوللاردان اسادى.
ا ق ش ۆيتسە-پرەزيدەنتى دج. د. ۆەنس التىنشى ورىندا. پوپۋليستىك ءستيلى مەن ب ا ق- تىڭ قولداۋىنىڭ ارقاسىندا ول تەز ارادا قازىرگى بيلىكتىڭ كورنەكتى تۇلعاسىنا اينالدى. ترامپ ونى مۇراگەر رەتىندە قاراستىرادى.
كەلەسى ورىندا – ا ق ش مەملەكەتتىك حاتشىسى ماركو رۋبيو. ول ترامپ اكىمشىلىگىندە كەڭ وكىلەتتىكتەرگە يە بولدى جانە ا ق ش سىرتقى ساياساتىنداعى ەڭ ىقپالدى تۇلعالاردىڭ بىرىنە اينالدى. اكىمشىلىكتىڭ داۋلى شەشىمدەرى مەن تانىمالدىلىعىنىڭ تومەندەۋىنە قاراماستان، رۋبيوعا قوعام وڭ قاباقپەن قارايدى، ءارى 2028-جىلعى پرەزيدەنتتىك ناۋقان الدىندا كورنەكتى تۇلعانىڭ ءبىرى بولىپ وتىر.
العاشقى وندىققا، سونداي-اق Alphabet جانە Google كومپانياسىنىڭ باس ديرەكتورى سۋندار پيچاي، Netflix باس ديرەكتورى تەد ساراندوس جانە YouTube باس ديرەكتورى نيل موحان بار.
«جاڭا ەليتا» تىزىمىنە 50 ادام كىرگىزىلگەن. ولاردىڭ اراسىندا ا ق ش پرەزيدەنتىنىڭ ەكى بالاسى كىشى دونالد ترامپ پەن يۆانكا ترامپ، ا ق ش پرەزيدەنتىنىڭ كۇيەۋ بالاسى دجارەد كۋشنەر دە بار.
باسقا كانديداتتاردىڭ قاتارىندا نيۋ-يورك قالاسىنىڭ مەرى زوران مامداني (دەموكرات)، كاليفورنيا گۋبەرناتورى گەۆين نيۋسوم (دەموكرات) جانە ريم پاپاسى XIV ليەۆ ەسىمدەرى اتالادى.
بۇعان دەيىن لۋيزيانا شتاتىنان سايلانعان رەسپۋبليكاشىل سەناتور دجون كەننەدي 2028-جىلعى پرەزيدەنت سايلاۋىنا قاتىسپاق ويى بارىن ايتقان بولاتىن.
