ا ق ش-تىڭ قازاقستانمەن ساۋدا جاساۋىنا تىيىم سالاتىن زاڭنىڭ كۇشىن جويۋ ماسەلەسى تالقىلاندى
استانا. KAZINFORM - ۆيتسە-پرەمەر سەرىك جۇمانعارين مەن ا ق ش-تىڭ ساۋدا وكىلى، ەلشى كەترين تاي ەكى ەل اراسىنداعى ساۋدا-ەكونوميكالىق قاتىناستاردىڭ وزەكتى ماسەلەلەرىن تالقىلادى.
كەلىسسوز بارىسىندا 1974-جىلعى ا ق ش-تىڭ ساۋدا تۋرالى زاڭىنا قابىلدانعان شەتەلگە ەميگراتسياعا كەدەرگى كەلتىرگەن جانە ادام قۇقىعىن بۇزعان ەلدەرمەن ساۋدانى شەكتەيتىن تۇزەتۋدىڭ (دجەكسون- ۆەنيك تۇزەتۋى) كۇشىن جويۋ پەرسپەكتيۆالارى قاراستىرىلدى.
كەزدەسۋدە سەرىك جۇمانعارين قازاقستان بۇل تۇزەتۋدى جويۋ ماسەلەسىن بىرنەشە رەت كوتەرگەنىن اتاپ ءوتتى.
اتاپ ايتقاندا، 2023-جىلدىڭ مامىرىندا ا ق ش كونگرەسىنىڭ وكىلدەر پالاتاسىنا «قازاقستانمەن تۇراقتى قالىپتى ساۋدا قاتىناستارى تۋرالى 2023-جىلعى زاڭ جوباسى» قاراۋعا جىبەرىلدى.
بۇل قازاقستانعا PNTR مارتەبەسىن بەرۋ ءۇشىن قاجەتتى شارالاردى قابىلداۋعا باعىتتالعان.
«قازىرگى ۋاقىتتا زاڭ جوباسىن وكىلدەر پالاتاسىنىڭ 33 مۇشەسى قولدادى، قۇجات ا ق ش وكىلدەر پالاتاسىنىڭ كوميتەتى جولدار جانە قۇرالدار كوميتەتىنىڭ ساۋدا جونىندەگى كىشى كوميتەتىندە قارالۋدا. ءبىز دجەكسون-ۆەنيك تۇزەتۋىنىڭ قازاقستانعا قاتىستى كۇشىن جويۋ جۇمىسى تەزىرەك وڭ ناتيجە بەرەدى دەپ ۇمىتتەنەمىز»،- دەپ سەرىك جۇمانعارين امەريكالىق تاراپقا جۇگىندى.
سونداي-اق تاراپتار قازاقستان مەن ا ق ش اراسىنداعى ساۋدا-ەكونوميكالىق بايلانىستاردى نىعايتۋداعى جالپى پرەفەرەنسيالار جۇيەسىنىڭ (GSP) ەرەكشە ءرولىن تالقىلادى.
امەريكالىق نارىققا شيكىزات جەتكىزەتىن قازاقستاندىق كاسىپورىندار ءۇشىن پرەفەرەنسيالار جۇيەسىن ودان ءارى قولدانۋدىڭ ماڭىزى اتاپ ءوتىلدى.
قازاقستاننىڭ ورتا ءدالىز جوبالارىندا، عالامدىق ينفراقۇرىلىم جانە ينۆەستيتسيالار بويىنشا سەرىكتەستىك (PGI) باسىمدىقتارىنا سايكەس، امەريكالىق ينۆەستورلار ءۇشىن قولايلى جاعداي جاساۋعا دايىن ەكەنى اتاپ ءوتىلدى.
«ءبىزدىڭ ماقساتىمىز - ترانزيت كولەمىن ودان ءارى ۇلعايتۋ پەرسپەكتيۆاسىمەن ينفراقۇرىلىمدىق جوبالاردى دامىتۋ. ورتا ءدالىز مۋلتيمودالدى كولىك مۇمكىندىكتەرىن قامتيتىندىقتان تاۋارلاردىڭ كەدەرگىسىز قوزعالىسىن قامتاماسىز ەتۋ، ونى تيىمدىرەك جانە ەكونوميكالىق جاعىنان ءتيىمدى ەتۋ قاجەت. مۇنداي جوبالاردى قاجەتتى قارجىلاندىرۋدى قامتاماسىز ەتۋ ءۇشىن DFC، EximBank جانە USAID سياقتى دامۋ ينستيتۋتتارىنىڭ بەلسەندى قاتىسۋىن قۇپتايمىز»، - دەدى سەرىك جۇمانعارين.
سونداي- اق تاراپتار وڭىرلىك دەڭگەيدە ازىق-تۇلىك قاۋىپسىزدىگىن قامتاماسىز ەتۋ، قازاقستاننىڭ اۋىل شارۋاشىلىعى الەۋەتىن ا ق ش- تىڭ ەڭ جاقسى تەحنولوگيالارى مەن تاجىريبەلەرىن پايدالانا وتىرىپ دامىتۋ مۇمكىندىكتەرىن تالقىلادى.
ايتا كەتەيىك، 1974-جىلى ا ق ش- تىڭ ساۋدا تۋرالى زاڭىنا تۇزەتۋ قابىلداندى (دجەكسون- ۆەنيك تۇزەتۋى)، ول شەتەلگە ەميگراتسياعا كەدەرگى كەلتىرگەن جانە ادام قۇقىعىن بۇزعان ەلدەرمەن ساۋدانى شەكتەيدى.
تۇزەتۋ ك س ر و-عا، قىتايعا، ۆەتنامعا، البانياعا، كەيىننەن پوستكەڭەستىك ەلدەرگە قاتىستى بولدى.
بۇگىنگى كۇنى تۇزەتۋ قازاقستان، وزبەكستان، تاجىكستان جانە تۇرىكمەنستانعا قاتىستى قولدانىلىپ كەلەدى.
قازاقستانعا قاتىستى تۇزەتۋدى ا ق ش كونگرەسى جىل سايىن توقتاتادى (ءبىراق جويىلمايدى).
دجەكسون- ۆەنيك تۇزەتۋىن جويۋ ماسەلەسى قازاقستان مەن ا ق ش اراسىنداعى ەكىجاقتى كەزدەسۋلەر بارىسىندا ءارتۇرلى دەڭگەيلەردە ۇنەمى تالقىلانادى.
