ا ق ش- تىڭ پەنسيلۆانيا شتاتىندا سايلاۋالدى اكسياسى كەزىندە دونالد ترامپقا قاستاندىق جاسالدى

استانا. KAZINFORM – ا ق ش پرەزيدەنتتىگىنە كانديدات دونالد ترامپ پەنسيلۆانياداعى سايلاۋالدى ناۋقانىندا ءسوز سويلەگەن كەزدە اتىس دىبىسى ەستىلدى. ول ءسوزىن ءبولىپ، الاڭنان شىعىپ كەتتى.

اتقان ادام قازا تاۋىپ، ميتينگكە قاتىسقان كەم دەگەندە تاعى ءبىر ادام كوز جۇمدى، دەپ جازدى اۋدان پروكۋرورىنىڭ ءسوزىن BBC.

اتىس باستالعان كەزدە بىردەن ترامپ مىنبەرگە ەڭكەيىپ، وققاعارلار جۇگىرىپ بارىپ، ونى الىپ كەتتى. كەتەر الدىندا ساياساتكەر جۇدىرىقتاي تۇيىلگەن قولىن ءبىر سىلتەدى. بەينەجازبادا ترامپتىڭ وڭ قۇلاعىنىڭ قانعا بويالعانى كورىنەدى.

ترامپتى قورعاۋعا جاۋاپتى قۇپيا قىزمەت مالىمدەمەسىندە شابۋىلداۋشى «شەرۋ الاڭىنىڭ سىرتىنداعى بيىك ايماقتان» ساحناعا قاراي بىرنەشە رەت وق اتقان.

— ا ق ش قۇپيا قىزمەتى وق اتقان ادامدى زالالسىزداندىردى، ول قازا تاپتى. ا ق ش قۇپيا قىزمەتى تەز ارادا قورعانىس شارالارىن قابىلدادى جانە بۇرىنعى پرەزيدەنت ترامپ قاۋىپسىز. ءبىر سايلاۋشى قازا تاۋىپ، ەكەۋى اۋىر جاراقات الدى. وقيعا بويىنشا تەرگەۋ امالدارى جۇرگىزىلۋدە. قۇپيالىق قىزمەت ف ب ر- ءدى حاباردار ەتتى، — دەلىنگەن حابارلامادا.

اتقان ادامنىڭ كىم ەكەنى ازىرگە جاريالانعان جوق.

اسسوشيەيتەد پرەسس ەكى قۇقىق قورعاۋ قىزمەتكەرىنە سىلتەمە جاساپ حابارلاۋىنشا، دونالد ترامپتىڭ شەرۋىندە بولعان اتىس قاستاندىق ارەكەت رەتىندە تەكسەرىلىپ جاتىر.

ترامپ وقيعادان كەيىن شامامەن 2,5 ساعاتتان كەيىن بايلانىسقا شىقتى.

«ماعان وق ءتيدى، ول وڭ قۇلاعىمنىڭ جوعارعى بولىگىن تەسىپ ءوتتى»، -دەدى ترامپ. - مەن بىردەڭە دۇرىس ەمەس ەكەنىن بىردەن ءتۇسىندىم، ىسقىرىقتى ەستىدىم، وق اتىلدى جانە وقتىڭ تەرىنى تيگەنىن بىردەن سەزىندىم. قاتتى قان كەتە باستادى، سوندىقتان مەن نە بولىپ جاتقانىن ءتۇسىندىم».

ول ا ق ش- تىڭ قۇپيالىق قىزمەتى مەن بارلىق قۇقىق قورعاۋ ورگاندارىنا جىلدام ارەكەت ەتكەنى ءۇشىن العىس ايتىپ، ميتينگىدە قازا تاپقاندار مەن جارالانعانداردىڭ وتباسىلارىنا كوڭىل ايتتى.

«مۇنداي ارەكەتتىڭ ءبىزدىڭ ەلدە بولۋى كەرەمەت»، - دەپ جازدى ترامپ.

«پرەزيدەنت بايدەن وقيعا تۋرالى اقپارات الدى»، - دەپ حابارلادى اق ءۇي.

بريفينگتى قۇپيالىق قىزمەت پەن ۇلتتىق قاۋىپسىزدىك دەپارتامەنتىنىڭ باسشىلارى، سونداي- اق بايدەننىڭ ىشكى قاۋىپسىزدىك جونىندەگى كەڭەسشىسى وتكىزدى.

- ماعان دونالد ترامپتىڭ پەنسيلۆانياداعى شەرۋى كەزىندە اتىس بولعانى تۋرالى حابارلادى. مەن ونىڭ امان-ەسەن جۇرگەنىنە قۋانىشتىمىن. وعان، ونىڭ وتباسىنا جانە ميتينگكە قاتىسقانداردىڭ بارلىعىنا دۇعا ەتەمىن. ءبىز اقپارات كۇتەمىز. دجيل ەكەۋمىز قۇپيا قىزمەتكە ونىڭ قاۋىپسىزدىگىن قامتاماسىز ەتكەنى ءۇشىن العىس ايتامىز. امەريكادا مۇنداي زورلىق- زومبىلىققا ورىن جوق. بۇكىل حالىق بىرىگىپ، بۇل زورلىق- زومبىلىقتى ايىپتاۋى كەرەك»، - دەدى ول.

ۆيتسە-پرەزيدەنت كامالا حارريسكە دە وقيعا تۋرالى ەگجەي- تەگجەيلى اقپارات بەرىلدى.

يزرايل پرەمەر-ءمينيسترى بينيامين نەتانياحۋ العاشقى رەاكسيا بىلدىرگەن شەتەلدىك كوشباسشىلاردىڭ ءبىرى بولدى.

«سارا ەكەۋمىز پرەزيدەنت ترامپقا جاسالعان شابۋىلعا تاڭ قالدىق، ءبىز ونىڭ قاۋىپسىزدىگى مەن تەز ساۋىعىپ كەتۋى ءۇشىن دۇعا ەتەمىز»، - دەپ جازدى ول X جەلىسىندە.

دۇنيە جۇزىندەگى ساياساتكەرلەرگە قاستاندىق جاساۋ ارەكەتتەرىنىڭ كوبەيۋى

ساراپشىلار سوڭعى كەزدەرى الەمدە ساياسي قاستاندىق جاساۋ ارەكەتتەرى مەن ءولىم قاۋپى ارتقانىن اتاپ ءوتتى.

وتكەن جىلى ەكۆادور پرەزيدەنتتىگىنە ۇمىتكەر فەرناندو ۆيلياۆيسەنسيو كيتودا ءولتىرىلدى.

ارگەنتينانىڭ ۆيتسە- پرەزيدەنتى كريستينا فەرناندەس دە كيرشنەر قاستاندىقتان امان قالدى، ءبىراق شابۋىلداۋشىنىڭ وعى قالىپ قويدى.

جاپونيا پرەمەر- ءمينيسترى سيندزو ابە قولدان جاسالعان قارۋدان قازا تاپتى.

جىلدىڭ باسىندا وڭتۇستىككورەيالىق وپپوزيتسيا جەتەكشىسى لي چجە مەن مويىنىنان جارالانىپ، كوكتەمدە سلوۆاكيا پرەمەر- ءمينيسترى روبەرت فيكو قاستاندىقتان امان قالدى.

امەريكا قۇراما شتاتتارىندا مۇنداي اتىشۋلى ىستەر ءالى بولعان جوق، ءبىراق امەريكاندىق جوعارى لاۋازىمدى شەنەۋنىكتەرگە قوقان- لوققىلار ءجيى تۇسە باستادى.

«نيۋ- يورك تايمس» گازەتى وتكەن جىلى پوليتسيا كونگرەسس مۇشەلەرىنە قارسى سەگىز مىڭنان استام قوقان-لوققىلاردى تەكسەرگەنىن جانە فەدەرالدى سۋديالارعا دا قورقىتۋلار جاسالعانىن حابارلادى.