ا ق ش-تىڭ مەملەكەتتىك قارىزى تاريحتا العاش رەت رەكورتتىق دەڭگەيدەن استى
استانا. KAZINFORM - ا ق ش-تىڭ مەملەكەتتىك قارىزى 2017 -جىلدان بەرى ەكى ەسە ءوسىپ، تاريحتا العاش رەت 40 تريلليون دوللاردان استى. بۇل فەدەرالدى بيۋدجەت تاپشىلىعىنىڭ تۇراقتىلىعى اياسىندا جاڭا رەكوردتىق دەڭگەي، دەپ حابارلايدى FOX Business.
ساراپشىلاردىڭ مالىمەتىنشە، بۇل سوما شامامەن قىتاي، گەرمانيا، جاپونيا، ۇلى بريتانيا جانە ءۇندىستان ەكونوميكالارىنىڭ جالپى قۇنىمەن شامالاس.
ا ق ش-تىڭ ۇلتتىق قارىزى جۇكتەمەنىڭ ارتۋى مەن پايىزدىق مولشەرلەمەلەردىڭ وسۋىنە، سونداي- اق ەل حالقىنىڭ قارتايۋىنا بايلانىستى الەۋمەتتىك قامسىزداندىرۋ مەن مەديتسينالىق كومەككە فەدەرالدىق شىعىنداردىڭ ارتۋىنا بايلانىستى تەز ءوسىپ كەلەدى.
- امەريكانىڭ ج ءى ءو-گە قاتىستى مەملەكەتتىك قارىزىنىڭ اراقاتىناسىن قالپىنا كەلتىرۋ ءۇشىن ەكونوميكالىق ءوسىمدى جەدەلدەتە وتىرىپ فەدەرالدىق شىعىندارداعى ىسىراپشىلدىق، الاياقتىق جانە تەرىس پايدالانۋدى ازايتۋعا باسا نازار اۋدارىلدى، - دەپ اتاپ ءوتتى ترامپ اكىمشىلىگى.
الايدا ساراپشىلار مەملەكەتتىك قارىزدىڭ قارقىندى ءوسۋى قاراپايىم امەريكالىقتارعا دا اسەر ەتىپ وتىرعانىن ايتادى. قارىزدىڭ رەكوردتىق دەڭگەيگە جەتۋى يپوتەكا مەن اۆتونەسيە سياقتى قارىزداردىڭ قىمباتتاۋىنا اكەلۋى مۇمكىن. سونىمەن قاتار ينۆەستيتسياعا قاراجاتى ازايعان كاسىپورىندار جالاقىنى تومەندەتىپ، تاۋارلار مەن قىزمەتتەردىڭ باعاسىن كوتەرۋگە ءماجبۇر بولادى.
- ەگەر قازىرگى جانە بولاشاق ۇرپاقتىڭ ءومىر ءسۇرۋ دەڭگەيىن جاقسارتقىمىز كەلسە، زاڭ شىعارۋشىلار ا ق ش-تى قارجىلىق تۇرعىدان قولجەتىمدى ءارى تۇراقتى جولعا ءتۇسىرۋ ءۇشىن قازىردەن باستاپ ارەكەت ەتۋى كەرەك، - دەدى ا ق ش-تىڭ بيۋدجەتتىك ساياساتىن زەرتتەيتىن پيتەر گ. پەتەرس قورىنىڭ باس ديرەكتورى مايكل ا. پەتەرسون.
مەملەكەتتىك قارىزدىڭ شامامەن ۇشتەن ءبىر بولىگى COVID-19 ىندەتى باستالعاننان كەيىنگى ەكى جىلدا ءوستى. دونالد ترامپ پەن دجو بايدەننىڭ تۇسىندا ۇكىمەت پاندەميامەن كۇرەسۋ ءۇشىن كوپ مولشەردە قارىز الدى.
ترامپ 2025 -جىلدىڭ قاڭتارىندا ەكىنشى رەت قىزمەتكە كىرىسكەننەن بەرى ا ق ش-تىڭ مەملەكەتتىك قارىزى 3,8 تريلليون دوللارعا ءوستى. بۇل پرەزيدەنتتىگىنىڭ ەكى مەرزىمىندە جالپى قارىزدىڭ 11,6 تريلليون دوللارعا وسۋىنە ىقپال ەتتى.
