ا ق ش- تىڭ اسكەري عارىش ۇشاعى 14 ايدان كەيىن جەرگە ورالدى

استانا. KAZINFORM - امەريكالىق Boeing X-37B عارىش ۇشاعى 14 اي بويى عارىشتا ءبىرقاتار تاجىريبەلەر مەن مانيەۆرلەر جۇرگىزدى. بۇل تۋرالى ا ق ش عارىش كۇشتەرى مالىمدەدى، دەپ حابارلايدى DW.

وربيتالىق ۇشقىش عارىشتا 434 كۇن بولىپ، «ا ق ش عارىش كۇشتەرىنىڭ عارىشتىق ورتا تۋرالى تۇسىنىگىن جاقسارتۋعا» باعىتتالعان ءبىرقاتار ەكسپەريمەنت پەن مانيەۆرلەر جۇرگىزگەن.

- بۇل تەحنولوگيالار ا ق ش عارىش كۇشتەرىنىڭ عارىش وپەراتسيالارىن جۇرگىزۋ قابىلەتىن ارتتىرۋ ءۇشىن وتە ماڭىزدى، - دەلىنگەن حابارلامادا.

X-37B  ۇشاق پەن عارىش كەمەسىنىڭ گيبريدى

2023 -جىلدىڭ 29 -جەلتوقسانىندا فلوريدا شتاتىنداعى كاناۆەرال ءمۇيىسى اۋە كۇشتەرىنىڭ ستانتسياسىنان ۇشىرىلدى. سودان كەيىن ول SpaceX كومپانياسىنىڭ Falcon Heavy اسا اۋىر زىمىرانىنىڭ كومەگىمەن العاش رەت اۋەگە كوتەرىلدى.

X-37B ادام باسقاراتىن عارىش كەمەسىنىڭ مينياتيۋرالىق نۇسقاسىنا ۇقسايدى. ونىڭ ۇزىندىعى 9 مەتر، قاناتىنىڭ كەڭدىگى 4,5 مەتر، ۇشىپ كوتەرىلۋ سالماعى 5 تونناعا جۋىق. ول كۇن باتارەيالارىنان قۋات الادى. وربيتادا ۇشۋدان كەيىن قۇرىلعى ۇشاق رەجيمىندە قونادى.

X-37B 2010 جىلدان بەرى قىزمەت ەتۋدە. ونى ا ق ش قورعانىس مينيسترلىگى ءۇشىن Boeing جانە Lockheed Martin بىرلەسكەن كاسىپورنى United Launch Alliance ازىرلەگەن.

ايتا كەتەيىك، بۇعان دەيىن ا ق ش كومپانياسى ۇشىرعان «Blue Ghost» عارىش اپپاراتى اي بەتىنە ءساتتى قونعانىن جازعان ەدىك.