ا ق ش تۇرعىندارىنىڭ 64 پايىزى جاساندى ينتەللەكتىنى قوعامعا زياندى دەپ سانايدى
استانا. KAZINFORM – ا ق ش- تا جۇرگىزىلگەن ساۋالناما تۇرعىنداردىڭ شامامەن 64 پايىزى جاساندى ينتەللەكتىنى قوعامعا «زياندى» دەپ سانايتىنىن كورسەتتى، دەپ حابارلايدى انادولۋ اگەنتتىگى.
The Hill گازەتىنىڭ حابارلاۋىنشا، ماركەتت ۋنيۆەرسيتەتى 2-9-قىركۇيەك ارالىعىندا 1023 ادامنىڭ قاتىسۋىمەن ساۋالناما جۇرگىزىپ، ولاردىڭ جاساندى ينتەللەكتىگە دەگەن كوزقاراسىن زەرتتەگەن.
زەرتتەۋ ناتيجەسىنە سايكەس، ساۋالناماعا قاتىسقانداردىڭ 64 پايىزى جاساندى ينتەللەكتىنى قوعامعا «زياندى» دەپ باعالاعان. ال 36 پايىزى كەرىسىنشە پىكىر بىلدىرگەن.
سونىمەن قاتار تەحنولوگياعا قاتىستى تەرىس كوزقاراسقا قاراماستان، ساۋالناماعا قاتىسقانداردىڭ 69 پايىزى جاساندى ينتەللەكتىنى قولداناتىنىن ايتقان.
ج ي- ءدىڭ دامۋىن باياۋلاتۋ توڭىرەگىندەگى پىكىرتالاس جالعاسىپ جاتىر
ا ق ش- تا جاساندى ينتەللەكتىنىڭ قارقىندى تارالۋى اياسىندا سوڭعى كۇندەرى تەحنولوگيا قاۋىپتى دەڭگەيگە جەتپەي تۇرىپ، ونىڭ دامۋىن باياۋلاتۋ تۋرالى ۇندەۋلەر كوبەيدى.
Anthropic كومپانياسىنىڭ باس ديرەكتورى داريو امودەي، OpenAI باس ديرەكتورى سەم التمان، سونداي-اق Tesla جانە SpaceX باسشىسى يلون ماسك سياقتى تەحنولوگيا سالاسىنىڭ ءبىرقاتار جەتەكشى وكىلدەرى جاساندى ينتەللەكتىنى ازىرلەۋ قارقىنىن باسەڭدەتۋگە شاقىرعان.
سونىمەن بىرگە اقش پرەزيدەنتى دونالد ترامپتىڭ اكىمشىلىگى جاساندى ينتەللەكتىنىڭ دامۋىن باياۋلاتۋى مۇمكىن جاڭا شەكتەۋلەر ەنگىزۋدىڭ ورنىنا يننوۆاتسيالاردى ىنتالاندىرۋعا باعىتتالعان ۇستانىمدى قولداپ وتىر.
ترامپ جاساندى ينتەللەكت تەحنولوگيالارىنىڭ باقىلاۋدان شىعىپ كەتۋ مۇمكىندىگىنە قاتىستى پىكىرلەردى «اۋرۋ كونسپيراتسيا» دەپ اتاعان. سونداي- اق ول بۇل سالاداعى جۇمىستى باياۋلاتۋ قىتايعا ارتىقشىلىق بەرەتىنىن مالىمدەگەن.
ايتا كەتەيىك، نوبەل لاۋرەاتى دجەففري حينتون ادامزات جاساندى ينتەللەكتىنى باقىلاۋدان شىعارىپ الۋى مۇمكىن ەكەنىن ەسكەرتتى. سەبەبى ج م «ۇرپاعىنا» ادامعا باعىنباۋدى وسيەت ەتە باستادى.
