ا ق ش تاياۋ شىعىستا جاعداي ۋشىعۋى مۇمكىن ەكەنىن ەسكەرتتى
استانا. KAZINFORM – ا ق ش-تىڭ تاياۋ شىعىستاعى ەلشىلىكتەرى ساۋد ارابياسىنداعى نىساندارعا حۋسيتتەردىڭ شابۋىلدارىنان كەيىن امەريكالىق ازاماتتاردى ساق بولۋعا شاقىردى، دەپ حابارلايدى Euronews.
باحرەين، يزرايل، يراك، يوردانيا، كۋۆەيت، ليۆان، ومان، كاتار، ساۋد ارابياسى جانە بىرىككەن اراب امىرلىكتەرىندەگى ا ق ش ديپلوماتيالىق وكىلدىكتەرى قاۋىپسىزدىك سالاسىنداعى جاعداي كۇردەلى كۇيىندە قالىپ وتىرعانىن مالىمدەدى.
- اسكەري قاقتىعىس تەز ارادا ۋشىعۋى مۇمكىن، - دەلىنگەن ا ق ش ديپلوماتيالىق وكىلدىكتەرىنىڭ ەسكەرتۋىندە.
سونداي-اق امەريكالىق ازاماتتارعا اۋە رەيستەرىنىڭ توقتاتىلۋى، اۋە كەڭىستىگىنىڭ جابىلۋى جانە كولىك قاتىناسىنداعى ىركىلىستەر بولۋى مۇمكىن ەكەنى ەسكەرتىلگەن.
مۇنداي ەسكەرتۋ حۋسيتتەردىڭ سەنبى كۇنى ساۋد ارابياسىنداعى نىساندارعا بالليستيكالىق جانە قاناتتى زىمىراندار، سونداي-اق ۇشقىشسىز ۇشۋ اپپاراتتارىن قولدانىپ ەكى وپەراتسيا جۇرگىزگەنىن مالىمدەۋىنەن كەيىن جاسالدى.
حۋسيتتەردىڭ مالىمەتىنشە، العاشقى وپەراتسيا ەر-ريادتاعى ماڭىزدى نىساندارعا، ال ەكىنشىسى يانبۋداعى Aramco كومپانياسىنىڭ نىساندارىنا باعىتتالعان.
كەيىن ساۋد ارابياسى باستاعان كواليتسيا وكىلى كورولدىكتىڭ اۋە شابۋىلىنا قارسى قورعانىس كۇشتەرى ەر-ريادقا باعىتتالعان بالليستيكالىق زىمىراندى ۇستاپ قالعانىن راستادى. ونىڭ ايتۋىنشا، حۋسيتتەر بايش، تايف، فاراسان جانە يانبۋ قالالارىنا دا سوققى جاساعان.
سەنبى كۇنى ەر-رياد تۇرعىندارى كورول حاليد اتىنداعى حالىقارالىق اۋەجاي اۋماعىندا وت پەن ءتۇتىن كورگەنىن حابارلاعان.
حۋسيتتەر شىلدە ايىندا ساۋد ارابياسىنا تەڭىز بلوكاداسىن جاريالاعان. سودان بەرى ساۋد ارابياسىنىڭ قالالارى مەن كەمەلەرىنە جاسالعان شابۋىلدار تاياۋ شىعىستاعى شيەلەنىستى كۇشەيتە ءتۇستى.
ساۋد ارابياسى دا حۋسيتتەرگە قارسى سوققىلار جاساپ كەلەدى.
