ا ق ش-تان ەلگە پوشتا ارقىلى ەسىرتكى جەتكىزىپ وتىرعان استانالىقتار 18 جىلعا سوتتالدى
استانا. KAZINFORM - استانانىڭ ەكى تۇرعىنى ەسىرتكى قۇرالدارىن تاراتقانى ءۇشىن 8 جانە 18 جىلعا دەيىن باس بوستاندىعىنان ايىرىلدى. بۇل تۋرالى ق م ا رەسمي وكىلى الىبەك ءابدىلوۆ ءمالىم ەتتى.
اگەنتتىكتىڭ ەلورداداعى دەپارتامەنتى ا ق ش- تان ەسىرتكى جانە پسيحوتروپتىق زاتتاردى حالىق تۇتىناتىن تاۋارلارى بار پوشتا سالەمدەمەلەرى تۇرىندە اسا ءىرى مولشەردە جەتكىزۋ فاكتىسىن اشكەرەلەدى.
ماسەلەن، قىزمەتتىك-ىزدەستىرۋ ءيتىن قولدانا وتىرىپ، تەكسەرۋ جۇرگىزۋ كەزىندە كەدەندىك باقىلاۋ ايماعىنداعى ۋاقىتشا ساقتاۋ قويماسىندا جالپى سالماعى شامامەن 1 ك گ بولاتىن «گاشيش» ەسىرتكى زاتى تابىلىپ، تاركىلەندى.
- سونىمەن قاتار، سوتقا دەيىنگى تەرگەۋ بارىسىندا جۇرگىزىلگەن مونيتورينگ ناتيجەلەرى «قازپوشتا» ا ق قالالىق فيليالدارىنىڭ بىرىندە سول الۋشىلاردىڭ اتىنا تاعى ءبىر سالەمدەمەنىڭ بار ەكەندىگىن كورسەتتى. سالەمدەمەدە جالپى سالماعى 7 گرامنان اساتىن كۇشتى پسيحوتروپتى زات - تەتراگيدروكاننابينول جانە ونىڭ يزومەرلەرى تابىلدى. ايىپتالۋشىلاردىڭ ءبىرىنىڭ پاتەرىن ءتىنتۋ كەزىندە ەسىرتكى قۇرالدارى، سونداي- اق وراۋىش ماتەريالدار مەن تارازى تابىلدى. سوت شەشىمىمەن ءىستىڭ ەكى قاتىسۋشىسى كىنالى دەپ تانىلىپ، ورتاشا قاۋىپسىزدىك كولونياسىندا جازاسىن وتەي وتىرىپ، 8 جانە 18 جىل مەرزىمگە باس بوستاندىعىنان ايىرىلدى، - دەدى قما رەسمي وكىلى الىبەك ءابدىلوۆ.
جالپى، جىل باسىنان بەرى ەسىرتكى كونترابانداسى جانە زاڭسىز اينالىمى فاكتىلەرى بويىنشا 116 قىلمىستىق ءىس تىركەلگەن. 57,3 ك گ ەسىرتكى تاركىلەندى.
سونىمەن قاتار، 1,7 ك گ پسيحوتروپتىق زاتتار، انابوليكتەر (ۋلى زات) - 206 مىڭ دانا جانە «تروپيكاميد» كوز تامشىلارى -1680 دانا تاركىلەندى.
- ەگەر سىزگە ەكونوميكالىق قۇقىق بۇزۋشىلىق جاساۋ فاكتىلەرى بەلگىلى بولسا، بۇل تۋرالى «ا ف م Insider» تەلەگرام بوتىنا حابارلاۋىڭىزدى سۇرايمىز. انونيمدىلىككە كەپىلدىك بەرىلەدى، - دەپ اتاپ ءوتتى سپيكەر.
بۇعان دەيىن ەسىرتكى قىلمىسىنا قاتىستىلىعى دالەلدەنگەن لاۋازىمدى تۇلعا ءومىر بويى باس بوستاندىعىنان ايىرىلۋى مۇمكىن ەكەنى ايتىلدى.
