ا ق ش- تاعى «حەلەن» داۋىلىنان 40 تان استام ادام مەرت بولدى

استانا. KAZINFORM - داۋىل الدىمەن فلوريداعا جەتىپ، كەيىن سولتۇستىككە قاراي - دجوردجيا، سونداي-اق سولتۇستىك جانە وڭتۇستىك كاروليناعا جىلجىدى، دەپ حابارلايدى BBC.

ا ق ش- تىڭ وڭتۇستىك-شىعىسىن شارپىعان «حەلەن» داۋىلى سالدارىنان كەمىندە 43 ادام قازا تاۋىپ، ميلليونداعان ادام جارىقسىز قالدى.

مەتەورولوگتار جەل ەكپىنى، قاتتى جاڭبىر مەن تورنادو قاۋپى سەيىلمەگەنىن ەسكەرتەدى. داۋىل ايماعىنداعى ۇيلەر مەن جولداردى جارتىلاي سۋ باسقان.

«حەلەن» داۋىلى - قۋاتتىلىعى بويىنشا ەكىنشى ورىندا تۇرعان، جەل جىلدامدىعى ساعاتىنا 240 شاقىرىمعا جەتەتىن 4- ساناتتاعى داۋىل. ا ق ش- تىڭ داۋىلداردى باقىلاۋ ۇلتتىق ورتالىعىنىڭ مالىمەتىنشە، «حەلەن» 24 ساعات ىشىندە باسىلۋى ءتيىس، ءبىراق قاتتى جەل، سۋ تاسقىنى جانە كوشكىن قاۋپى ساقتالادى.

«حەلەن» قۇراما شتاتتاردا داۋىل قۋاتتىلىعى رەيتينگىندە 14- ورىنعا يە بولدى. بۇل رەتتە ونىڭ ەنى 675 ك م- گە جەتەدى جانە بۇل تاريحتاعى ءۇشىنشى كورسەتكىش - ودان اۋقىمدى بولعان الاپات داۋىلدار 2017-جىلى سوققان «يدا» جانە 1996-جىلى سوققان «وپال».

فلوريدادا جۇمادان بەرى كەم دەگەندە سەگىز ادام قايتىس بولدى. دجوردجيا گۋبەرناتورى برايان كەمپتىڭ حابارلاۋىنشا، شتاتتا داۋىل سالدارىنان كەم دەگەندە 15 ادام، ونىڭ ىشىندە ءبىر قۇتقارۋشى قازا تاپقان. كەمپ قۇتقارۋ جۇمىستارىنا ۇلتتىق گۆارديانىڭ 1000 مۇشەسىن جۇمىلدىرۋدى بۇيىردى. گۋبەرناتوردىڭ ايتۋىنشا، شتاتتا 150 دەن استام جول جابىق، 1300 باعدارشام ىستەن شىققان، كەيبىر عيماراتتاردا ادامدار قالىپ قويعان.

CBS News مالىمەتىنشە، وڭتۇستىك كارولينادا كەم دەگەندە 17 ادام قازا بولدى. سولتۇستىك كارولينادا ەكى ادام جانە ۆيردجينيادا ءبىر ادام قازا تاپقانى تۋرالى حابارلاندى.

ب ا ق- تاردىڭ جازۋىنشا، تەننەسسي شتاتىنا قاراستى ەرۆين قالاسىندا 58 پاتسيەنت پەن قىزمەتكەرلەر اۋرۋحانانىڭ شاتىرىنا شىقتى، اۋا رايىنىڭ قولايسىزدىعىنا بايلانىستى ولاردى باستاپقىدا قايىقتارمەن نەمەسە تىكۇشاقتارمەن ەۆاكۋاتسيالاۋ مۇمكىن بولمادى. كەيىن ادامداردى پوليتسيا مەن ۇلتتىق گۆارديانىڭ تىكۇشاقتارى عيمارات توبەسىنەن الىپ كەتتى.

ساقتاندىرۋ كومپانيالارى «حەلەن» كەلتىرگەن شىعىندى ميللياردتاعان دوللارعا باعالادى.