ا ق ش- تا ترامپتىڭ سۋرەتى بار 250 دوللارلىق كۋپيۋرا شىعارۋ ۇسىنىلدى
استانا. KAZINFORM - وڭتۇستىك كارولينادان رەسپۋبليكاشىل كونگرەسسمەن دجو ۋيلسون ا ق ش پرەزيدەنتى دونالد ترامپتىڭ سۋرەتى بار 250 دوللارلىق كۋپيۋرانى شىعارۋدى ۇسىندى. بۇل تۋرالى Axios حابارلادى.
- بايدەنفلياتسيا ەكونوميكانى جويىپ، امەريكالىق وتباسىلاردى كوبىرەك قولما-قول اقشامەن جۇرۋگە ءماجبۇر ەتتى، - دەپ ءتۇسىندىردى كونگرەسسمەن ءوز باستاماسىن.
ۋيلسون بۇل بانكنوتتا ترامپتىڭ پورترەتى بەينەلەنۋىنىڭ سەبەبى رەتىندە «ەڭ قىمبات بانكنوت ەڭ قۇندى پرەزيدەنت ءۇشىن» دەگەن قاعيدانى العا تارتتى.
بۇعان دەيىن كەيبىر كونگرەسمەندەر دونالد ترامپتىڭ تۋعان كۇنىن ۇلتتىق مەرەكە دەپ جاريالاپ، وعان ءۇشىنشى رەت پرەزيدەنتتىك سايلاۋعا تۇسۋگە رۇقسات بەرۋدى ۇسىنعان.
الايدا كونگرەسسمەن ۋيلسوننىڭ ۇسىنىسى زاڭسىز. 1866-جىلى ا ق ش كونگرەسى قابىلداعان زاڭعا سايكەس، اقشالار مەن تيىندارعا ءتىرى ادامداردىڭ سۋرەتىن سالۋعا تىيىم سالىندى. ءبىراق ترامپتىڭ جاقتاستارى قازىر كونگرەسستىڭ ەكى پالاتاسىندا دا كوپشىلىككە يە، بۇل ەرەجە تەوريالىق تۇرعىدان جويىلۋى دا مۇمكىن دەگەندى بىلدىرەدى.
ايتا كەتەيىك، قازىرگى ۋاقىتتا ا ق ش- تا قولدانىلىپ جۇرگەن ەڭ ۇلكەن كۋپيۋرا 100 دوللار. ەلدە بۇرىن 10000 جانە 100000 دوللارلىق بانكنوتتار شىعارىلعان. ولار قازىر ءىس جۇزىندە جويىلدى، ءبىراق بانكارالىق وپەراتسيالار ءۇشىن نەمەسە ينكاسساتسيا ماقساتىندا ساقتالادى.
ايتا كەتەيىك، ا ق ش كونگرەسمەنى داللەس اۋەجايىنىڭ اتاۋىن ترامپتىڭ اتىمەن اتاۋدى ۇسىنعان بولاتىن.
