ا ق ش- تا سيرەك سوعاتىن بوراننان كەم دەگەندە 9 ادام قازا تاپتى
استانا. KAZINFORM - سەيسەنبىدەن باستاپ ا ق ش- تىڭ وڭتۇستىگىندە سيرەك سوعاتىن قىسقى «ەنتسو» داۋىلى كۇشەيىپ، ەلدىڭ كوپ بولىگىندە ايازدى اۋا رايىن اكەلدى. سارسەنبى كۇنى تاڭەرتەڭگى جاعداي بويىنشا داۋىلدان كەم دەگەندە 9 ادام قازا بولدى. بۇل تۋرالى امەريكالىق ب ا ق حابارلادى، دەپ جازدى شينحۋا اقپارات اگەنتتىگى.

ا ق ش- تىڭ ۇلتتىق مەتەورولوگيالىق قىزمەتىنىڭ حابارلاۋىنشا، جاڭا ورلەان (لۋيزيانا)، موبيل (الاباما)، پەنساكولا (فلوريدا) جانە باسقا دا كوپتەگەن قالادا قاردىڭ رەكوردتىق كولەمى جاۋدى. جاڭا ورلەانداعى 1948 - جىلدان بەرى ەڭ قاتتى بوران تىركەلدى.
قىسقى داۋىلعا بايلانىستى ا ق ش وڭتۇستىگىندەگى بىرنەشە شتاتتا توتەنشە جاعداي جاريالاندى. مەكسيكا شىعاناعى جاعالاۋىندا قار مەن كوكتايعاق سالدارىنان بىرنەشە ءىرى اۋەجايدا بىرنەشە رەيس، 30 عا جۋىق ايماقارالىق تاسجولدا كولىك قوزعالىسى توقتاتىلدى. باستاۋىش جانە ورتا مەكتەپتەر، مەملەكەتتىك مەكەمەلەر جانە كوپتەگەن دۇكەن مەن مەيرامحانالار جابىلدى.
CNN تەلەارناسىنىڭ حابارلاۋىنشا، قاتتى سۋىق پەن كوكتايعاق جولدار سالدارىنان بولعان اۋىر جول- كولىك وقيعالارى مەن باسقا دا اپاتتاردان 9 ادام قازا تاپتى.
قولدا بار دەرەكتەرگە سۇيەنسەك، قىسقى بوران سەيىلە باستادى. سارسەنبى كۇنى تاڭەرتەڭگى جاعداي بويىنشا، ا ق ش- تىڭ اۋا رايى قىزمەتى تاراتقان ايازدى كۇن رايى تۋرالى ەسكەرتۋ ەلدىڭ شىعىس جانە وڭتۇستىك - شىعىس بولىكتەرىندەگى 25 ميلليوننان استام ادامعا اسەر ەتىپ وتىر.