ا ق ش- تا قۇپيا اقپاراتتىڭ تارالۋىنا بايلانىستى گەنەرال قىزمەتىنەن كەتتى

ا ق ش ارمياسىنىڭ گەنەرال-لەيتەنانت برەتت سيلۆي بىرىككەن شتاب باستىقتارى كوميتەتىندە ستراتەگيا، جوسپارلاۋ جانە ساياسات جونىندەگى ديرەكتور قىزمەتىن اتقاردى جانە يرانمەن سەگىز ايلىق قاقتىعىستىڭ باسىنان اياعىنا دەيىن جەتەكشى اسكەري ستراتەگ بولدى.

قورعانىس مينيسترلىگىنىڭ وكىلى سيلۆيدى «مينيستر حەگسەت اۋىر ءتارتىپ بۇزعانى ءۇشىن قىزمەتىنەن بوساتقانىن» ايتتى.

- سيلۆي يران سوعىسى جانە باسقا دا ماسەلەلەر تۋرالى قۇپيا اقپاراتتىڭ تارالۋىنا قاتىستى تەرگەۋدىڭ فيگۋرانتى بولىپ وتىر. پەنتاگوننىڭ عيماراتقا كىرگەن جۋرناليستەردى ەرتىپ ءجۇرۋدى تالاپ ەتەتىن ب ا ق ساياساتىنا بايلانىستى، سيلۆي قۇپيا اقپاراتتاردى ءبولىسۋ ءۇشىن جۋرناليستەرمەن پەنتاگوننىڭ سىرتىندا كەزدەسە باستادى، - دەدى مينيسترلىك وكىلى.

شەنەۋنىكتىڭ ايتۋىنشا، گەنەرال تەكسەرىستەن وتپەگەن.

- سيلۆي قۇپيا اقپاراتتى جاريا ەتۋگە قاتىستى سۇراقتار قويىلعان ءۇش پوليگرافيالىق سىناقتان وتپەدى. وعان قاتىستى تەرگەپ-تەكسەرۋ ءجۇرىپ جاتىر، ءىس كەلەسى شارالاردى قابىلداۋ ءۇشىن ا ق ش ادىلەت مينيسترلىگىنە جولداندى. قۇپيا اقپاراتتىڭ تارالۋىنىڭ سالدارى اۋىر بولعاندىقتان، مينيستر حەگسەت ۇلتتىق قاۋىپسىزدىكتى قورعاۋ ءۇشىن دەرەۋ ارادا شارا قولدانىپ، سيلۆيدى جۇمىستان شىعاردى. شۇعىل شارالار قاجەت بولدى جانە ونى ءبىر سەكۋندقا دا كەشىكتىرۋگە بولماس ەدى، - دەدى ول.

پەنتاگوننىڭ رەسمي وكىلى شون پارنەلل X الەۋمەتتىك جەلىسىنە قۇپيا اقپاراتتى تاراتۋ اسكەردىڭ ءومىرىن قاتەرگە تىگەتىنىن جازدى.

- قورعانىس مينيسترلىگى قۇپيا اقپاراتتىڭ ءتيىستى رۇقساتسىز ادەيى جاريا ەتىلۋىنە جول بەرمەيدى. ۇلتتىق قاۋىپسىزدىك تۋرالى قۇپيا اقپاراتتى جاريالاعان كەز كەلگەن ادام ءبىزدىڭ ساربازدارىمىزدىڭ ءومىرىن قاۋىپ-قاتەرگە تىگەدى جانە ۇلتىمىزدىڭ قاۋىپسىزدىگىن قامتاماسىز ەتۋگە باعىتتالعان بارلىق اسكەري وپەراتسيالارعا نۇقسان كەلتىرەدى، - دەپ جازدى پارنەلل.

الايدا، بىرىككەن شتاب باستىقتارى كوميتەتىنىڭ وكىلى ءسيلۆييدى ماقتاپ، كوميتەت ءتوراعاسى، بىرىككەن شتاب باستىقتارى كوميتەتى جانە بىرىككەن كۇشتەر «گەنەرال-لەيتەنانت برەتت سيلۆي مەن ونىڭ وتباسىنا 32 جىل بويى ەلگە سىڭىرگەن ادال ەڭبەگى ءۇشىن تەرەڭ ريزاشىلىق بىلدىرەتىنىن» جانە باسشىلىق «وعان جانە ونىڭ وتباسىنا اماندىق تىلەيتىنىن» جەتكىزدى.

ەسكە سالايىق، ا ق ش- تىڭ قارۋ-جاراق قورلارى تۋرالى قۇپيا اقپاراتتىڭ تارالۋىنا بايلانىستى پەنتاگوندا اۋقىمدى تەكسەرىس جۇرگىزىلدى.

ا ق ش قورعانىس مينيسترلىگىنە قاراستى كادرلىق دەرەكتەر بازاسىنا جاسالعان كيبەرشابۋىل سالدارىنان 3 ميلليونعا جۋىق ادامنىڭ جەكە مالىمەتتەرى اشىلىپ قالدى.

ا ق ش- تىڭ يرانمەن سوعىسقا جۇمساعان شىعىنى 47 ميلليارد دوللاردان اسقانى حابارلانعان.