ا ق ش-تا قولتىراۋىن بالىقشىنى سۋ استىنا تارتىپ اكەتتى

ۇزىندىعى شامامەن 3,6 مەتر بولاتىن باۋىرىمەن جورعالاۋشى 71 جاستاعى قاريا ستيۆەننىڭ ءومىرىن قيدى. بۇل - فلوريدادا بيىل بولعان وسىنداي ەكىنشى وقيعا، دەپ حابارلايدى BILD.

كۋاگەرلەردىڭ ايتۋىنشا، ستيۆەن اپوپكا كولىندە قارماعىنا تۇسكەن بالىقتى جاعاعا شىعارىپ، جانىنداعى سەرىگىنەن ولجاسىمەن بىرگە سۋرەتكە ءتۇسىرۋدى سۇراعان. سول ساتتە سۋدان قولتىراۋىن شىعىپ، ونىڭ اياعىنان تىستەپ، سۇيرەپ اكەتكەن.

ارادا ءبىراز ۋاقىت وتكەن سوڭ قولتىراۋىن زەينەتكەردى قايتادان سۋ بەتىنە شىعارعانىمەن، ونى جىبەرمەگەن. تەرگەۋشىلەردىڭ بولجاۋىنشا، سوڭىندا بالىقشى سۋعا باتىپ كەتكەن.

ۋينتەر- گاردەن پوليتسياسىنىڭ حابارلاۋىنشا، سۋ ايدىنىندا قولتىراۋىندار كوپ بولعاندىقتان، قۇتقارۋشىلار وقيعاعا بىردەن ارالاسا الماعان. ءورت ءسوندىرۋ قىزمەتىنىڭ باسشىسى حوسە گاينسانىڭ ايتۋىنشا، ەر ادامنىڭ دەنەسى سۋدان شامامەن ەكى ساعاتتان كەيىن شىعارىلعان.

پوليتسيا فلوريدا شتاتىنىڭ بالىق جانە جابايى تابيعاتتى قورعاۋ كوميسسياسىمەن بىرلەسىپ، وقيعانى تەرگەۋگە كىرىستى. بۇدان بولەك، جابايى تابيعاتتى قورعاۋ ينسپەكتورلارى شابۋىلعا قاتىسى بار دەپ بولجانعان قولتىراۋىندى ۇستاپ العان.

اۋەدەن تۇسىرىلگەن كادرلاردا 6 ادامنىڭ الىپ باۋىرىمەن جورعالاۋشىنى سۋدان شىعارىپ، جاعاعا سۇيرەپ جاتقانى كورىنەدى. ينسپەكتورلار ونىڭ اۋزىن بايلاپ، جانۋاردى ولتىرگەن.

فلوريدا شتاتىنىڭ دەرەكتەرىنە سايكەس، 1948-جىلدان بەرى قولتىراۋىنداردىڭ شابۋىلىنان بارلىعى 34 ادام قازا تاپقان. ولاردىڭ ەكەۋى 2026-جىلى كوز جۇمعان.

2025-جىلى قولتىراۋىن 61 جاستاعى ايەل وتىرعان كانوەنى اۋدارىپ جىبەرگەن. ال 2023-جىلى قولتىراۋىن ءيتىن سەرۋەندەتۋگە شىقپاق بولعان 85 جاستاعى ايەلدى ءوز باقشاسىنان سۋعا سۇيرەپ اكەتكەن.

ايتا كەتەيىك، اۋستراليادا قولتىراۋىندار مەكەندەيتىن وزەندە وليمپيادا جارىستارى وتەدى.

بۇعان دەيىن اۋستراليا پوليتسياسى سۋ تاسقىنىنان كەيىن ەلدە قولتىراۋىندار كوبەيگەنىن ايتىپ، تۇرعىندارعا ەسكەرتۋ جاسادى.