ا ق ش- تا ءىرى كومپانيا باسشىسىن ءولتىردى دەگەن كۇدىكتىگە اۋىر ايىپ تاعىلدى
استانا. KAZINFORM — دۇيسەنبى كۇنى كەشكە پەنسيلۆانيا شتاتىندا United Healthcare باس ديرەكتورى برايان تومپسوندى ءولتىردى دەگەن كۇدىككە ىلىنگەن لۋيدجي ماندجونەگە ەكى بىردەي اۋىر قىلمىس جاسادى دەگەن ايىپ تاعىلدى، دەپ جازادى NBC News.
كۇدىكتى دۇيسەنبى كۇنى پەنسيلۆانيا شتاتىنىڭ التۋنا قالاسىندا قاماۋعا الىندى، ونى McDonald’s كليەنتتەرىنىڭ ءبىرى تانىپ قويعان.
قۇقىق قورعاۋ قىزمەتكەرلەرىنىڭ ايتۋىنشا، وفيتسەرلەر لۋيدجي ماندجونەدەن بەتپەردەسىن شەشۋىن سۇراعاننان كەيىن ونىڭ برايان تومپسوننىڭ ولىمىنە كۇدىكتى جىگىت ەكەنىن بىردەن تانىعان.
كۇدىكتىدەن برايان تومپسوندى اتۋ كەزىندە قولدانىلعان قارۋعا ۇقسايتىن تاپانشا تاركىلەنگەن. سونداي-اق، كۇدىكتىنىڭ بىرنەشە جالعان كۋالىگى مەن ا ق ش ءتولقۇجاتى بولعان. دەگەنمەن پوليتسيا ول قاشۋدى جوسپارلادى دەپ ەسەپتەمەيدى. جالعان قۇجات نيۋ-دجەرسي شتاتى مەيپلۆۋد قالاسىنىڭ 26 جاستاعى تۇرعىنى مارك روساريوعا تيەسىلى بولىپ شىقتى. ول شابۋىلدان بىرنەشە كۇن بۇرىن نيۋ-يوركتەگى حوستەلگە كىرۋ ءۇشىن پايدالانىلعان.
ماندجونەگە جالعان قۇجات جاساۋ جانە ليتسەنزياسىز قارۋ الىپ ءجۇرۋ، سونداي-اق قۇجاتتارىن نەمەسە جەكە باسىن انىقتاۋدى بۇرمالاۋ، قىلمىس قۇرالدارىن ساقتاۋ جانە قۇقىق قورعاۋ ورگاندارىنا جالعان كۋالىك بەرۋ بويىنشا ءۇش ايىپ تاعىلدى.
پوليتسەيلەر ودان برايان تومپسوندى ءولتىردى دەپ بولجانعان ادامنىڭ كيىمىنە ۇقساس كيىم-كەشەك، سونداي-اق قىلمىس موتيۆىن ايقىندايتىن قولمەن جازىلعان ءۇش پاراق تۇرىندەگى ايعاق تاپتى. دالەلدەر التۋنا پوليتسياسىنىڭ قولىندا.
ول وزىنە تاعىلعان ايىپتاردى مويىندامادى. وعان كەپىل بەرىپ بوساپ شىعۋعا رۇقسات بەرىلمەدى.
وعان جاقىن ارادا برايان تومپسوندى ولتىرۋگە قاتىستى ايىپ تاعىلادى دەپ بولجاندى.
ەسكە سالساق، بۇدان بۇرىن ا ق ش سيرياداعى 75 تەن استام نىساناعا سوققى بەرگەنى انىقتالدى.
