ا ق ش-تا ءۇش جۋرناليست ترامپتى اق ۇيگە كىرۋگە تىيىم سالعانى ءۇشىن سوتقا بەردى
استانا. KAZINFORM – ا ق ش-تا CNN، MS NOW جانە Politico باسىلىمدارىنىڭ جۋرناليستەرى دونالد ترامپتى اق ۇيگە كىرۋگە تىيىم سالعانى ءۇشىن سوتقا بەردى، دەپ حابارلايدى DW.
دونالد ترامپ 19-قىركۇيەكتە CNN، MS NOW جانە Politico جۋرناليستەرىنىڭ اق ۇيگە كىرۋىنە رۇقساتتى قايتارىپ الىپ، اتالعان ب ا ق-تاردىڭ جاريالانىمدارىن «ادىلەتسىز» دەپ اتاعان. ءۇش باسىلىم وعان قارسى بىرلەسكەن تالاپ-ارىز ءتۇسىردى.
- اق ءۇي ەشقانداي ەسكەرتۋ جاساماستان ءبىزدىڭ جۋرناليستىك اككرەديتاتسيالارىمىزدى قايتارىپ الدى. بۇعان ولاردىڭ ءبىزدىڭ وقيعالاردى جاريالاۋىمىزعا قارسىلىق ءبىلدىرۋى سەبەپ بولدى. ەگەر بۇل شەشىمگە قارسىلىق كورسەتىلمەسە، ول باسپا ءسوز بوستاندىعىنا جانە قوعامنىڭ ۇكىمەت ىقپالىنان تاۋەلسىز جۋرناليستيكانى الۋ قۇقىعىنا قاۋىپ توندىرەدى، - دەلىنگەن ب ا ق-تاردىڭ بىرلەسكەن تالاپ-ارىزىندا.
باسىلىمدار ۆاشينگتونداعى فەدەرالدىق سۋدياعا جۋرناليستەرىنىڭ اق ۇيگە كىرۋىنە قويىلعان تىيىمدى شۇعىل تۇردە الىپ تاستاۋ جانە زارداپ شەككەن تىلشىلەردىڭ اككرەديتاتسياسىن قالپىنا كەلتىرۋ تۋرالى ءوتىنىش جولدادى.
ترامپ تالاپ-ارىزعا ءوزىنىڭ Truth Social الەۋمەتتىك جەلىسىندەگى جازباسى ارقىلى جاۋاپ بەردى.
- اق ءۇي ەركىن باسپا سوزگە شابۋىل جاساپ جاتقان جوق - مەن ونى قۇرمەتتەيمىن. اق ءۇي جالعان جاڭالىقتارعا شابۋىل جاساپ جاتىر. ولار ءبىز جاقسى كورەتىن امەريكا قۇراما شتاتتارىندا قاتەرلى ىسىك سەكىلدى كەڭ تاراپ كەتتى. ولار جەمقور، ارەكەتتەرى ماقساتتى تۇردە جاسالادى، اۋقىمدى ءارى مۇقيات ۇيلەستىرىلگەن جانە ولار باقىلاۋدان تولىق شىقتى،- دەپ جازدى ا ق ش پرەزيدەنتى.
ال Fox News تەلەارناسىنىڭ ۆاشينگتونداعى بيۋرو باسشىسى، اق ۇيدەگى تەليەۆيزيالىق پۋل كونسورتسيۋمىنىڭ مىندەتىن اتقارۋشى ءتوراعاسى برايان بوۋتون CNN ءنىڭ پۋل اياسىنداعى مىندەتتەرىن ورىنداۋىنا اق ءۇيدىڭ مۇمكىندىك بەرمەۋىنە بايلانىستى تەليەۆيزيالىق پۋل دونالد ترامپتىڭ قاتىسۋىمەن وتەتىن ءىس-شارالاردى جاريالاۋدى توقتاتاتىنىن مالىمدەدى.
بۇدان بۇرىن حابارلانعانداي، سۋديا ترامپ اكىمشىلىگىنىڭ گارۆاردقا قارسى تالاپ ارىزىن قاناعاتتاندىرمادى.
